آفة من آفات الكرة المصرية... كابتن حسام البدري هو المدير الفني للمنتخب الأوليمبي واقترب من عام في الشغلانة دي والمنتخب الاولمبي مستقر معاه وحاله زي الفل في المعسكرات والوديات وخلاص هيبدأ مشواره في التصفيات الأوليمبية... لكن بعد إقالة شوقي غريب من المنتخب الأول حسام البدري حاطط في راسه لو جه مدرب مصري غيره للمنتخب الأول هيستقيل من المنتخب الأوليمبي!!!، ليه يا عم الحاج؟... أنا أولى!!، طيب والمنتخب الأوليمبي يروح فين؟، انت اللي عملت أساسه وطبيعي لو جه مدرب جديد له فكره مختلف مش هيلحق يضبط إيقاع الفريق مع إيقاعه والمنتخب الأوليمبي هيقع... ناهيك بقى عن الأصول... هوه مش من الأصول انك تكمل عملك للآخر يا كابتن حسام البدري؟.

طيب مرتبك ومرتب جهازك المعاون اللي هيروح هدر لانك سبت المنتخب الاوليمبي قبل بداية التصفيات وهييجي حد جديد ينسف اللي عملته وهيقول ساعتها ان المنتخب الاوليمبي لم يستعد جيدا وهيعمل زى اى حد فيكم ما بييجي يقلل من شغل اللي قبله... مرتباتكم دي هترجع؟، ما هوه انت هتروح المنتخب الأول تبدأ من جديد هناك وأول مباراة رسمية بعد سنة ونص... والله اعلم يمكن ساعتها يجيلك عقد لتدريب منتخب المغرب تقوم سايب منتخبنا وتجري على المغرب، وبدل ما نحاول نصلح حال المنتحب الأول يقع مع الأوليمبي في الهوا سوا.

بالعربي كدة... اللي بيجرى في الوسط الكروي المصري فضيحة بكل المقاييس، وانه يتم ترديد الكلام الفارغ ده عادي كدة ومن ناس اعضاء في اتحاد الكرة يبقى دول ناس لا مؤاخذة مالهمش عازة... واللي يفقع مرارتك اكتر ان فيه صحفيين بيكتبوا في عواميدهم انه ده حق حسام البدري... لكن نعمل إيه في اتحاد الكرة اللي أعضاءه كلهم جايين من اندية درجة تانية وتالتة مالهمش في الكورة وأنديتهم تعاني في الدرجات الأدنى واستمرارهم في قيادة الكرة فضيحة لوحدها... والصحافة اللي وصل بيها الحال ان شوية عيال دخلوها حين غفلة من أهلها أصبح يقال عن بعضهم "الكاتب الصحفي"... وهم يحتاجون دروسا في الهجاء والإملاء.