هاجم أمير مرتضى منصور نجل رئيس الزمالك وأحد أضلاع تعاقدات الأبيض في الفترة الأخيرة احمد سليمان عضو مجلس ادارة الزمالك السابق.

واتهم نجل مرتضى عضو المجلس السابق أنه يسعى للشهرة ونسب الصفقات لنفسه خاصة في فترة وجوده واتخاذ كل الفضل وهذا غير صحيح.

وقال أمير عبر صفحته على موقع التواصل الاجتماعي كلمات حادة الى احمد سليمان كان نصها كالتالي:

"رسالة للأخ الاكبر العميد احمد سليمان و إلى جمهور الزمالك Ahmed Soliman

للأسف رغم انه مش وقته الكلام اللي هقوله ده بس لازم التوضيح علشان من حق الجمهور يعرف ايه اللي بيحصل دلوقتي والكلام ده بقوله بصفتي مشجع زملكاوي قريب من الاحداث و كمان بصفتي متطوع اني اتفاوض و اتعاقد مع بعض اللاعبين و المدربين عندما يطلب مني نظراً لقربي من بعض اللاعبين سواء في الفريق او في فرق الدوري .. لازم الناس تركز في النقط اللي هقولها لأني بخاطب الجمهور الذكي الواعي اللي بيفهما و هي طايرة

١- مش اي شخص ينزل صورة مع لاعب سواء مسئول او وكيل او حتى انا يبقى هو اللي جابه لأن في مجهود كبير بيتعمل في مرحلة التفاوض مش عايزين نختذله في مين اللي خد الصورة.

٢-لا انكر دور كابتن احمد سليمان كباقي اعضاء المجلس في انهاء الصفقات و الانشاءات و جلب عقود رعاية تليق بالزمالك ولكن السؤال كيف عرف جمهور الزمالك ان الكابتن احمد سليمان هو جنرال الصفقات ؟؟؟ الاجابة عن طريق السوشيال ميديا و الصور التي ينشرها الكابتن احمد سليمان مع اللاعبين

٣-سؤال إلى جمهور الزمالك .. ماذا لو قام اي مسئول اخر او عضو مجلس ادارة غير الكابتن احمد سليمان بنشر صورهم مع الصفقات ؟؟ مثال لو المدير الاداري الكابتن حمادة انور نزل صوره مع كل صفقات الموسم الحالي عالفيسبوك هل ده معناه ان حمادة انور هو ملك الصفقات الجديد!!!

٤- سؤال مباشر لأخويا الكبير الكابتن احمد سليمان .. لماذا قمت بوضع شروط جزائية في عقود اللاعبين الشناوي و باسم مرسي و لماذا لا تتحمل المسئولية امام الجماهير عن هذا الخطأ الجسيم ... ما هي حاجة من الاتنين يا حضرتك اللي جبتهم الزمالك وتكون مسئول عن بنود عقودهم كاملاً يا اما حضرتك لم تتفاوض معهم من الاساس بالتالي ليس عليك التباهي و التفاخر بالتعاقد معهم..وبالتالي في ناس تانية مطالبة بتدارك خطأك و تعديل عقود اللاعبين و إلغاء الشروط الجزائية في عقودهم

٥-ليه يا كابتن احمد اي لاعب من اللاعبين اللي حضرتك متصور معاهم لما بيجيب جول او بيتألق حضرتك فوراً بتنزل صورتك معاه في اشارة للجمهور ان الفضل ليك انت لوحدك ... مع العلم ان اي لاعب الزمالك تعاقد معاه بعد حضرتك ما استقلت و تألق مع الزمالك او احرز هدف حضرتك بتتجاهله مع انهم من ابناء النادي و اخرهم تألق شيكابالا واحرازه هدف في اخر مباراة!!!

 

٦-اي انتقاد علني مني لحضرتك لا يقلل من احترامي ليك مع العلم اني عمري ما انتقدت حضرتك اثناء وجودك بالمجلس و انتقادي ليك دلوقتي من زملكاوي لزملكاوي رغم اني كان عندي انتقادات لحضرتك كتير اثناء وجودك بالمجلس لكن انا مؤمن انه مش من حقي انتقد اداءك كعضو مجلس ادارة حتى لو عندك اخطاء زي عقود بعض اللاعبين المبالغ فيها او الشروط الجزائية الغير مبررة للشناوي و باسم او خلافك مع شيكابالا و غيرها

٧- لازم الجمهور يبقى فاهم ان الزمالك نادي كبير و ان اي لاعب يتمنى يلعب للزمالك او الاهلي و ده واقع و حقيقة لا يمكن انكارها يعني لما اتعاقد مع لاعب من اي نادي في مصر علشان يلعب في الزمالك دي مش محتاجة عقلية فذة لأن ٩٠٪ من نجاح المفاوضات بتكون مرتبطة بأسم و جماهيرية الزمالك مش بأسم المسئول اللي بيتفاوض مهما كانت قيمته او شهرته او نفوذه و ١٠٪ المتبقية بتكون مرتبطة بإرتياح اللاعب للشخص المكلف بالتفاوض و بأسلوبه في التفاوض و المقابل المادي و فرصة مشاركته كأساسي و بعض الوعود الشفوية اللي مش بتتكتب في العقد

٨-لو عايزين نكافأ او نشكر شخص بسبب صفقة معينة سواء بيع او شراء لاعب او مدرب لازم نفهم امتى نقوله برافو .. نقول برافو لما الشخص اللي بيتفاوض ان يغير وجهة اللاعب مثلاً من الاهلي للزمالك او انه يجيب اعلى سعر في بيع لاعب او انه يجيب لاعب او مدرب مهم بفلوس قليلة او انه يكون عنده رؤية مستقبلية انه يحط بنود في عقد اللاعب يقدر النادي يستفيد منها حتى بعد رحيل اللاعب زي ما حصل مع عمرو ذكي مثلاً يجيب اهداف مع ويجان الزمالك ياخد فلوس ويشكر في ده مجلس ممدوح عباس

٩-الزمالك الموسم قبل الماضي تعاقد مع ق١٨ لاعب استفاد في الموسم ده من ١٤ لاعب من ال ١٨ وحصد الدوري والكاس مع اختلاف نسب استفادة الفريق من كل لاعب في لاعيبة فادت الفريق طوال الموسم و في لاعيبة فادت الفريق على فترات وجعملت اللي عليها على قدر المتاح (الشناوي-على جبر-كوفي-اسلام جمال-دويدار-احمد سمير-ابراهيم صلاح-معروف يوسف-محمد شعبان-طارق حامد-ايمن حفني-احمد عيد-خالد قمر-باسم مرسي) يعني نسبة نجاح الصفقات في الموسم الاول تخطت ال ٩٠٪

١٠- الموسم السابق الزمالك دعم صفوفه ب ٨ لاعبين (كهربا-حمودي-محمد ابراهيم-شيكابالا-محمد عادل جمعة-

محمد سالم-ابراهيم عبد الخالق-مايوكا-شريف علاء) و موسم الانتقالات ده كان كابتن احمد سليمام تقدم بإستقالته قبل ما نتعاقد مع اي لاعب بعد مشكلته مع شيكابالا

١١-الموسم الحالي الجمهور الزملكاوي كان مستاء جداً من الادارة بسبب عدم تدعيم الفريق للموسم الجديد و فجأة و بعد الاعلان عن نصف الصفقات فقط شعرت الجماهير بالارتياح .. هل المفترض الاعلان عن الصفقات قبل انتهائها حتى يرضى الجمهور ام نعلي مصلحة النادي و نتكتم على المفاوضات حتى لا تفشل او لا يتدخل المنافس للمزايدة و سيتم الاعلان عن باقي الصفقات حين الانتهاء منها

١١-رسالة لجمهور الزمالك اللي بيسأل ليه كهربا وعمر جابر مشيوا رغم احتياج الفريق ليه و احتياج الفريق اهم من الدولارات .. احب اقول ان الكواليس بتكون مختلفة و صادمة رغبة اللاعب و طموحه بتكون اقوى من عقده و مفيش لاعب هيلعب غصب عنه حتى لو متبقى في عقده ١٠ سنين يبقى في الحالة دي اقل الخسائر ان نستفيد منه مادياً لو مش هنستفيد منه فنياً

١٣- في بعض اللاعبين بدون ذكر اسماء اللي الجمهور بيطالب ان الزمالك يتعاقد معاهم علشان اللاعيبة دول زملكاوية و صرحوا في الاعلام و الفيسبوك انهم هيموتوا و يلعبوا في الزمالك لو بيلاش.. احب اقولكم والله العظيم في الكواليس بيطلبوا ملايين بس للاسف الواحد بيحترم سرية المفاوضات و ميطلعش يقول اللي بيحصل في الكواليس .. اسهل حاجة ان الواحد يحط اي رقم اللاعب يطلبه و يقول وانا مالي هو انا دافع حاجة من جيبي و بعدين الجمهور عايز اللاعب ده و لو جيبته هبقى ملك الصفقات و حبيب الملايين

١٤-هل من المنطقي الاعلان عن الصفقات رغم ان الفريق الحالي على اعتاب بطولتين مهمين كأس مصر و دوري الابطال!!!

١٥- بالنسبة للصفقات و القيد الافريقي و القائمة المحلية .. وارد يتم اعارة لاعب مهم في الفريق في وفرة في مركزه سواء داخل الفريق او داخل الدوري المصري في المقابل الابقاء على لاعب تاني مستواه مش قوي لكن ميكونش ليه بدائل

١٦- عزيزي الزملكاوي هل تعلم ان هناك بعض الشخصيات المحسوبة عالزمالك للأسف بتكلم اللاعيبة اللي الزمالك بيتفاوض معاهم و يقولولهم الزمالك مفهوش فلوس من منطلق انهم مش في الصورة او لخلافات مع رئيس النادي !!! اتمنى ان تدرك الجماهير حجم المسؤلية و الصعوبات .. الزمالك باقي و كله ماشي

 

‫#‏انضف_جمهور_في_العالم"