قال الإعلامي أحمد شوبير، خلال برنامجه على قناة الأهلي، إن الهجوم المستمر على النادي بعد أي تعثر أصبح متوقعًا، مشيرًا إلى أن هناك من لا يريد الخير للأهلي، ولن يرضيه شيء، حتى لو فاز الفريق بكل البطولات.

وأوضح شوبير:اللي بيكرهك مش هيسقفلك حتى لو كسبت الباسكت، والهاندبول، والفولي، وكأس إفريقيا. مهما عملت، هيفضل يقول أصل الفريق التاني كان تعبان، أصل البطولة ضعيفة… هو ببساطة مش بيحبك".

وأضاف:"نعم، من حق الجماهير تزعل، تتضايق، تعاتب، لكن في النهاية لازم تفتكر شعارنا: على الحلوة والمرة معاه. أنت لسه واخد الدوري، ولسه بطل أفريقيا، ولسه بتمثل القارة في كأس العالم للأندية، وبتشارك دايمًا".

وتوقف شوبير عند تصريحات مدرب بالميراس بعد اللقاء، مؤكدًا أن المدرب أشاد بقوة الأهلي وخبرته، رغم الفوز، كما أشار إلى صعوبة الأجواء المناخية في أورلاندو وقت المباراة.

وأكد: "قسماً بالله الجو كان صعب جدًا… ظروف المباراة كانت غير طبيعية، توقفات، عواصف، وتأجيلات، وبرغم ده الأهلي كان ند قوي".

وأكمل: "لما إنتر ميامي كسب بورتو، بقيت الناس تشكر في ميسي والفاولات… طب ما هو نفس الفريق اللي قبلها الناس كانت بتقول عليه فريق عواجيز؟ هي المسألة على المزاج؟"

وأتم: "أنا بشوف ناس بتيجي توقفنا في الشارع بتشيرت الأهلي في أمريكا، جمهور من كل الجنسيات بيحب النادي. وده معناه إن الأهلي مش نادي عادي… الأهلي كيان عالمي. لازم نفضل مساندينه، واثقين فيه، حتى وسط الظروف الصعبة".