تحدث سيد معوض المدرب المساعد السابق لمنتخب مصر عن واقعة مصطفى محمد مهاجم نادي جالطة سراي الترجي خلال مباراة الجابون في تصفيات كأس العالم.
وقال معوض في تصريحات تلفزيونية أمس "لما شوفت الفيديو في المطار اتضايقت جدًا لأن رد فعل مصطفى محمد كان صعب وغير مقبول، جاملنا مصطفى محمد بعدم استبعاده من المعسكر بعد تأخره، ولا نعلم سبب ما فعله من خروج عن النص".
وتابع "المعسكر ده له ظروف خاصة، بعد ما بعتنا اسامي المحترفين كان في 2 لعيبة كوكا ومصطفى محمد عندهم عروض من اندية تانية، مصطفى كان وضعه أصعب شوية من كوكا علشان القيد في فرنسا هيقفل بدري عن تركيا، وواصل "كوكا قال انه هيتأخر علشان العروض، لكن مصطفى محمد مقالش، غاب يوم والتاني واكتشفنا انه في فرنسا بيعمل الكشف الطبي وبكدة هو تأكد غيابه عن المباراة الأولى".
وأضاف "مصطفى وصل يوم المباراة، لو أنا كجهاز فني عاوز اخلص عليك هطلع اتكلم واخرجك من المعسكر، ده ماتش كأس عالم، لو عاوز اخلص كان سهل، ده قميص منتخب مصر وحلم لأي حد وشرف لأي حد يكون موجود، الجهاز الفني عمل جميل معاك ومتمش استبعادك والأمور عدت ليه تعمل تصرف زي ده؟، مفيش حاجة في المنتخب اسمها حجز اماكن".
وواصل "هو ومحمد شريف بتتنافسوا على المركز وهو كان بقاله 4 او 5 ايام مش بتتمرن ومحمد شريف بيسجل مع المنتخب، انت عاوز تيجي متاخر وتيجي تلعب أساسي كمان، كوكا الي اتأخر يوم وجه متكلمش ومفيش صوت، ممكن تبقى عايش في دور انا عديت المرحلة دي، لكن تشوف واحد من افضل 3 لعيبة في العالم وهو محمد صلاح مش بتسمع صوته سواء قبل ما يكون الكابتن او بعدها".
وأضاف معوض "اول ما ربنا يكرمك بحاجة لازم تتواضع أكتر، لما تجيب جول لازم تحمد ربنا انك جبت جول، مش تعمل موقف زي ده، البدري عنف مصطفى محمد خلال وجوده على الدكة بالفعل ولكن هو وقف معاه انه خلاه يكمل في المعسكر بعد تأخره عن المعسكر".
واختتم تصريحاته"كان سهل جدًا الجهاز الفني يبيع مصطفى محمد قدام الناس، ويطلع في المؤتمر الصحفي يبقى بطل على حسابه ويقول انه تأخر عن المعسكر ويقرر يستبعده، لو كان في تجمع تاني للمنتخب عمري ما كنت هكتب اسم مصطفى محمد في اي تجمع لحد ما يكون في اعتذار".