لعل قسوة الأحداث تزداد مرارة عندما يتذكر المرء أن أحلامه لامست عنان السماء قبل أن تنقلب الطاولة على رأسه، وأن "العشم" جعله يعيش خيالًا أصبح واقعًا لغيره.. ولا يوجد مثال لشرح هذه الكلمات أكثر مما مر به جمهور (الدرجة التالتة يمين)، التي استقبلت شباكها في ليلة السابع والعشرون من نوفمبر 2020 طعنة في القلب أنهت ما يمسى بحلم السادسة.
El-Ahly.comعاد بالزمان لما قبل ليلة السابع والعشرون من نوفمبر، وقلّب في صفحات التاريخ، ليجد قصة وسيناريو وحوار جاهزين تمام الجاهزية لعمل مسرحي يتفوق على أعلى الأعمال الكوميدية.
هذا العمل يليق أن يقوم بإخراجه روبرت بي وايد صاحب المسلسل الأمريكي الشهير "اكبح حماسك"، الذي يدور حول رجل لديه كل شيء: الزوجة، والأصدقاء، ومنزل كبير. لكن دائمًا ما يوجد ما يُعكر صفو حياته المثالية.. أو بمعنى أدق يجد "الأهلي".
ويستعرض El-Ahly.comبمناسبة الذكرى الأولى لـ "القاضية ممكن" بعض تصريحات الزملكاوية التي تبرز ما أوصله بهم العشم لدرجات، أزادت رصاصة أفشة مرارة وقسوة:
خالد الغندور 25 نوفمبر
أنا بقولكم قولًا واحدًا لاعيبة الزمالك رجالة والله، عندنا رجالة، أبو جبل راجل أوي، وطارق حامد راجل أوي، وساسي راجل أوي، وبن شرقي لعيب أوي. عندنا أوناجم. عندنا أحمد سيد زيزو من وجهة نظري أفضل لاعب في مصر، حاليا متكامل دفاعيًا وهجوميًا. عندنا محمود علاء المدافع الهداف. عندنا حازم إمام وأحمد عيد وإسلام جابر وكاسونجو وشيكابالا ممكن يكون مكان أوباما، وعندنا أحسن مهاجم فيكي يا مصر بسم الله ما شاء الله مصطفى محمد.
متخافوش، متقلقوش، عندنا أبو جبل بقى أحسن حارس مرمى في مصر، هو والشناوي، لا ننكر إن الشناوي من الحراس الكبار ولكن أبو جبل لا يقل عنه، بل وتفوق عليه في السوبر المصري في ضربات الجزاء وجاب البطولة للزمالك بتصديات تاريخية. أبو جبل خد اكتر من مرة أحسن حارس في الأدوار الافريقية في وجود الشناوي.
احمد سيد زيزو
مع احترامي لكارتيرون أو طارق يحيى أو باتشيكو. اللاعيبة عندها هدف ومجلس الادارة عنده هدف إننا ناخد بطولة افريقيا، مين موجود مش مهم، اللاعيبة عندها روح وإصرار وعزيمة ووعد أيا كان اللي موجود كلنا ايد واحدة، إن شاء الله نحقق بطولة غالية جدًا غايبة عن الزمالك بقالها فترة طويلة، إن شاء الله بدون مبالغة البطولة في ميت عقبة، جماهير الزمالك تعتبره وعد
طارق يحيى 26 نوفمبر
متخيلين اننا خدنا الكونفدرالية في اخر 2019 وخدنا سوبر افريقي في 2020 وخدنا سوبر مصري، يعني سوبر إفريقي وكونفدرالية يعني بطولاتان قارياتان وبعدين تاخد دوري أبطال ؟ ده انت كده روحت في حتة تانية خلاص روحت في حتة تانية اوي اوي اوي – 3 بطولات قارية في سنة ونص !! لم تحدث في تاريخ الزمالك إنه خد 3 بطولات قارية في سنة ونص، أو حتى في 10 سنين أو 5 سنين.. ممرتش عليا.
مصطفى محمد 26 نوفمبر
يجب أن نفعل كل شيء للفوز بهذه المباراة. سأبذل قصارى جهدي لإعادة هذه الكأس التي استعصت علينا طوال 18 عامًا.. لا ينبغي أن ننسى أن الزمالك فاز بكأس الكونفدراليةالأخيرة ثم فزنا على الأهلي في نهائي كأس السوبر. كما فزنا على الأهلي هذا الموسم وأتيحت لي فرصة التسجيل. بصراحة نستطيع أن نقترب من الفوز بهذه المباراة بدون تعقيدات خاصة وأننا نعرف صفات خصمنا وتاريخه. أريد أن أترك فريقي وأنصاره من خلال منحهم أفضل هدية ممكنة وأحلم بأن أكون حاسماً في هذا النهائي وأعود بالكأس.
خالد الغندور 5 نوفمبر
فرجاني ساسي أحرز هدفًا عالميًا أمام الرجاء، ومصطفى محمد سجّل هدفًا عالميًا، فرجاني لاعب كبير، سدد الكرة بوجه القدم الخارجي (بينشنها في المرمى) – مصطفى محمد ايه ده ؟ مع احترامي لكريستيانو رونالدو وكل الناس اللي تقول شوف كريستيانو طلع فين ونط 2 متر و44 سنتيمتر، احنا عندنا واحد من أفضل لاعيبة العالم في ضربات الرأس، هذا اللاعب يمتلك موهبة ضربات الرأس، بقالنا كتير جدا معندناش الموهبة دي.
بقولها على مسئوليتي اقسم بالله مصطفى محمد من أفضل لاعيبة العالم في ضربات الرأس، عنده توقيت سليم وارتفاع وتوجيه وعارف طريق المرمى وعضلات قوية خصوصا الأمامية والسمانات وعضلات البطن.
تامر عبد الحميد 24 نوفمبر
أحسن لاعب في الزمالك مقولكش واحد، فيه ناس كتير، بن شرقي مش أحسن لاعب، لأ ممكن اعدلك 90% من الفرقة، فيه ناس بتسألني نقط قوة الزمالك، 90% من الفرقة ما شاء الله، خط الدفاع أكتر من الهجوم، بيمنعوا هدف، ده مش نقاط قوة ؟ إن كان محمود علاء او الونش او محمد عبد الغني او ابو جبل.
كهربا كان ازاي عندنا ؟ احنا نيتنا حلوة، كان نجم في الزمالك، نيتنا حلوة ازاي ؟ كهربا مشي جالنا حد أحسن، وهو بن شرقي، احنا نيتنا حلوة، بن شرقي في حتة تانية بمراحل، في مرة كان بيسخن فاتصاب فعيط عاوز يلعب، شوفت الروح ؟ مش كهربا لما اتغير كسّر الدكة كلها، هنا العقلية !
عمرو الدرديري 14 نوفمبر
الزمالك أقرب للمكسب بنسبة 60%، الزمالك جهّز لاعيبته أفضل عنده حافز اقوى للفوز بالبطولة، دوافع الزمالك أكبر لأنه مخدش البطولة بقالة فترة أطول لذلك بيسعى أنه يضيف البطولة لدولاب بطولاته، كمان الأحداث اللي بتحصل دي بتوحي للاعيبة والجمهور إن كأن الكل ضدهم.
عمر الدردير 26 نوفمبر
الزمالك هيكسب 2-1، الهدفين في الشناوي، الشناوي هو اللي هياخد الهدفين، أحسن حارس في مصر وفي افريقيا هو اللي هيدخل فيه الهدفين، أنا من الناس المعجبين بالشناوي، حارس مرمى كبير وعلى مستوى كبير بجد وهيكون ليه دور كويس الفترة الجاية، هو مش أحسن حارس، لكنه من أحسن الحراس.
لازم يبقى عندي ضمير واتكلم بصراحة، أبو جبل مقدرش ابخسه حقه، عمل شغل السنة دي، أبو جبل أفضل من الشناوي السنة دي شوية، أبو جبل نظرا للمباريات الأخيرة هو أفضل من الشناوي.
جمال عبد الحميد 31 أكتوبر
أنا متفائل إننا هناخد البطولة. ليه ؟ الزمالك كسب الرجاء اللي أقوى من الوداد، وقبلها بيوم الأهلي كسب الوداد ووضع ضغوط على لاعيبة الزمالك، وقبلها بأسبوع فرجاني ساسي مش عارفين هيلعب ولا لأ وهو لاعب مهم في الفريق وده ضغوط على لاعيبة الزمالك، وحازم إمام مش هيلعب وده ضغوط على اللاعيبة، موقف محمود علاء هداف الفريق وضع ضغوط على اللاعيبة، ومشكلة رئيس النادي ضغوط على اللاعيبة ورغم ذلك كسبوا الرجاء في المغرب.
ده يديك مدلول ان اللاعيبة عندهم دافع ياخدوا البطولة، سواء بنلاعب بقى الرجاء أو الأهلي بيلاعبوا أي حد، احنا هناخد البطولة دي، برغم ان عندنا كل المشاكل دي والأهلي مش عنده ولا مشكلة، اللاعيبة دلوقتي عندها دافع تاخد البطولة لانها قابلت صعوبات أكتر من اللي جاي.
بشير التابعي 11 نوفمبر
الزمالك هيكسب، اه وش كده الزمالك هيكسب، أول مرة اقول بقلب جامد كده ان الزمالك هيكسب بسبب اللي انا شايفه، شايف ان فيه حالة استقرار وارتفاع المستوى الفني لأغلب لاعيبة الزمالك اللي موجودة، الزمالك هيكسب ان شاء الله
حمادة انور 25 نوفمبر
ركبي بتخبط في بعض ؟ أنا ؟ أنا أسد – معايا اسود في الملعب، ركبي تخبط في بعض ازاي !، الناس قلقانة ؟ جمهور الزمالك مش قلقان، جمهورنا عنده ثقة
حمادة انور 26 نوفمبر
بقولك ايه يا ابراهيم (فايق) أنا بثق في لاعيبة الزمالك جدًا، الميزة في لاعيبة الزمالك حاليا ان لاعيبة عندها شخصية خصوصًا في المباريات اللي هي زي ما نقول عليها بالضربة القاضية، انا بقول ان الزمالك بيتفوق في المباريات دي.. مباراة صعبة على الفرقتين لكن انا عارف شخصية لاعيبة الزمالك بتفرق في المباريات دي.
مرتضى منصور للاعبي الزمالك قبل لقاء الإياب أمام الرجاء
انتوا كلكم رجالة، حد فيكم بيخاف ؟ بتخافوا (لاعيبة الزمالك بصوت عال لأ)، إن شاء الله نحتفل بالكأس وال 3 ونص مليون دولار اللي هيبشبشوكوم كلكموانا معاكم، أنا معاكم كنادي يعني، نقرأ الفاتحة على الإخلاص والنصر وقوة الإدارة نكسب بإذن الله.
جايمي باتشيكو 27 نوفمبر
لقد كان طريقا طويلًا وصعبًا للوصول إلى النهائي خاصة في ظل الظروف الحالية، ها نحن هنا، ونريد الفوز باللقب كهدية لمشجعينا.. نسعى للفوز اليوم.
مرتضى منصور للاعبي الزمالك قبل نهائي القرن
كسبنا الترجي في قطر عشان انتوا أبطال، وكسبتوا الهلال في السعودية، وكسبتوا الأهلي في السوبر، وكسبتوا الأهلي تاني في الدوري، وكسبتوا الرجاء البطل مرتين هنا وهناك، مفيش فريق أقوى منكم في إفريقيا.
عندنا أحسن فريق كلكم ممتازين، لاعيبة الأهلي مش احسن منكم، انتوا الأقوى، الفريق ده غلبتوه السنادي مرتين تلاتة، ايه الجديد ؟اعرف انك انت الأقوى والفريق اللي انت هتلاعبه يوم الجمعة ده انت غالبه مرتين تلاتة في مواجهات مباشرة واخرهم كاس السوبر. مصطفى اتمطع ولف وجيب
شيكابالا لمرتضى منصور خلال اجتماع مع لاعبي الزمالك
بنشكرك انك رغم انك تعبان وجيتلنا النهاردة، وانت عارف ان احنا بيفرق معانا جدا ان حضرتك بتيجي قبل الماتشات الكبيرة، وبنتفائل احنا بالوقفة دي، وان شاء الله هنوقفها تاني بعد يوم الجمعة واحنا كسبانين ان شاء الله.