شن مرتضى منصور رئيس نادي الزمالك هجوم حاد على طارق حامد لاعب خط وسط نادي الفريق بعد تهربه من خوض المباريات مع فريقه.
وقال مرتضى منصور في تصريحات تلفزيونية أمس الأحد "انا مش بحب اظلم حد، انا متابع التحقيق في الملف ده، وقبل ما تبدا الشؤون القانونية تحقيقها، انا بحقق".
وتابع "في الأول طارق قالي هروح اسبانيا وقال للمدير الفني هروح المنصورة، هو راح اسبانيا والمانيا ولف العالم، طارق خرج من أخر مباراة شارك فيها مطرود مش مصاب".
وأضاف "طارق حامد كان في نادي سموحة محدش يعرفه، وعارف فرج عامر كان بيتعامل معاك ازاي، يا أخ طارق انت استاذنت اسبوع واحد فقط، سيبك من الورقة الي انت مطلعها للإعلام دي ومطلعها لنفسك".
وواصل "انا جبت الدكتور محمد أسامة وقعدت معاه، سالته هل طارق حامد جابلك التقارير الطبية لعلاجه؟، قالي ولا ورقة، قولتلهم خلاص عاوز ورقة علشان نبدا معاه التحقيق في الشئون القانونية، وعقده ممتد معانا لآخر شهر أغسطس، هو تمرد وتهرب من مباريات مهمة".
وأردف مرتضى "يبقى طارق حامد قولا واحد كان متمرد ومتمارد وكان هربان من ماتش الأهلي زي ما هرب من ماتش الوداد".
مختتمًا حديثه "كلامي واضح، وكلامي ميزعلش حد احنا بنقرر واقع، هل انت جبت التقارير من اسبانيا انك كنت بتتعالج؟ لا مجابش ورقة واحدة".