تحدث محمد أبو جبل حارس مرمى الزمالك السابق ومنتخب مصر عن كواليس رحيله من ناديه وأزمته مع نادي النصر السعودي.
وقال أبو جبل في تصريحات تلفزيونية أمس الإثنين "عندي عدد من العروض في مصر والخارج، ملفي مع نادي النصر انتقل للقضاء وحاليا انا لاعب بدون نادي وبناقش العروض في الفترة الحالية".
وتابع "انا عاوز اعرف ليه بتهاجم بالطريقة دي، الزمالك عمره ما قصر معايا لكن في حاجات بتحصل غصب عن الواحد وخارج عن إرادة أي حد".
وواصل "انا كنت بطلع اتكلم مع الإدارة علشان اجدد عقدي واتقال انت مش في اولويات النادي، طبيعي ادور على عقد مع نادي تاني".
وأضاف "محتاج 3 ايام اقعد اتكلم عن الي حصل معايا واوضح الصورة لجماهير الزمالك، مرة واتنين وتلاتة انا الي بطلع اتكلم مع الادارة اقولهم محتاج فلوس واجدد عقدي وكان الرد اني مش اولوية في النادي ويجددوا مع لعيبة عقودهم فيها سنتين وتلاتة".
وأردف ابو جبل "لم يحدث ان عرضت عليا لجنة حسين لبيب نفس المقابل المادي أمام لزيزو، لو مرتضى منصور كان موجود في النادي كنت جددت، علاقتي مع فيريرا كويسة هو معتبرني ابنه وانا بقوله يا بابا".
مختتمًا تصريحاته "الاعتذار لجمهور الزمالك من أجل العودة؟ الجمهور على دماغي من فوق وبنلعب في الزمالك علشان اسم النادي وجماهيره، لكن انا متأكد لو قلت الي عندي والمواقف الي عديت بيها آخر 6 شهور في عقدي جمهور الزمالك هيعذرني في كل تصرف انا عملته لإن رغم الي حصل لم اقصر مع النادي".