كشف الشافعي صالح رئيس مجلس إدارة نادي أسوان، تفاصيل هروب رافائيل أياجوا مهاجم الفريق الأول لكرة القدم بالنادي خلال الأيام القليلة الماضية.
وقال الشافعي صالح خلال حديثه عبر قناة أون تايم سبورتس: "اللاعب متعاقد مع نادي أسوان وينتهي العقد في عام 2025 لعب مباراة الزمالك كاملة يوم 18-5 يوم 19-5، إدارة فندق الإقامة بلغت الإداري بأن اللاعب ده مش موجود، اللاعب أجرى اتصال معاه قاله أيوة أنا في المطار مسافر قاله طب أنت مخدتش اذن من حد قاله أنا مسافر وأنا في المطار.. ده لاعب أجنبي عندي مش عاوز اضيق عليه وبيقول للاداري انه عاوز الجواز علشان يغير عملة فبيديله الجواز".
وأضاف: "بعد كدة تواصلوا معاه وجدوا أنه سافر إلى نيجيريا وتأكدنا أن اللاعب حجز تذكرة سفر من يوم 8-5 يعني هو مبيت النية على السفر التزمنا الهدوء ومتكلمناش علشان كان عندنا مباراة هامة أمام البنك الأهلي".
وأكمل: "انهاردة بيقول أنا تعبان احنا عندنا جهاز طبي على أعلى مستوى والراجل مقالش ده ميشاركش في المباريات أو التدريبات بدليل أنه شارك في مباراة الزمالك كاملة ده عنصر أساسي في الفريق وبيشارك بصفة مستمرة واللاعب حاصل على كافة مستحقاته المالية واخد كل فلوسه".
وواصل: "المفاجأة انهاردة دعوة الفرح بتاعه حد جابهالي وبعتهالي عنده فرح يوم 26 بلغنا الاتحاد المصري لكرة القدم من يوم الانقطاع وشغالين في مذكرة هنبعتها لشئون اللاعبين في الفيفا علشان نحافظ على حقوق النادي".
وأتم رئيس نادي أسوان حديثه: "اللاعب يريد العودة للنادي من جديد، لا يوجد مانع لدينا من عودته، وسيوقع عليه أكبر عقوبة مالية، وسنستمر في الإجراءات القانونية ضد تصرفه للحفاظ على حقوق النادي".