كشف أحمد ياسر ريان مهاجم الفريق الأول لكرة القدم بنادي سيراميكا كليوباترا، سر إهداره الفرصة السهلة الشهيرة أمام بيراميدز في بطولة كأس السوبر المصري.
وقال أحمد ياسر ريان خلال حديثه عبر قناة صدى البلد: "الكرة دي معرفش هما عشر ثواني من حياتي فصلوا ورجعوا تاني".
وأضاف: "الاستلامة هي اللي عملت كدة وخلتني أضيعها بالشكل ده لأني كنت عاوز استلمها بعيدة عني شوية واحطها بباطن القدم لكن لما استلمتها جت تحتي فلعبتها بكعب رجلي".
وأكمل: "أنا شايف المدافع وحارس المرمى جايين يضغطوا عليا فكنت عاوز استلم الكرة واحطها على طول لكن لما اتفرجت عليها لقيت أنه كان في مساحة أني أستلم بطريقة أحسن من كدة".
وواصل: "لو أنا مستهتر أو حبيت احتفل قبل ما اجيبها أو أي حاجة من الحاجات دي ملهاش علاقة بأنها تضيع الكرة سهلة فالناس متخيلة أني احتفلت بس القصة مش كدة خالص القصة أني أستلمتها بطريقة غلط".
واختتم أحمد ياسر ريان حديثه: "شوفت الفيديو بعد الماتش شوفت كوميكس وحاجات هزار كنت متضايق ومخنوق بعد كدة خلاص الموضوع عدى".