علق الإعلامي أحمد شوبير على احتفالية نادي الزمالك بافتتاح متحفه الجديد، مشيرًا إلى أن الموضوع تم بطريقة سريّة جدًا ولم يتم دعوة الإعلام ولا نجوم الكرة للحضور.

وقال شوبير في تصريحاته: "نتوقف مع حدث مهم جدًا في نادي الزمالك حصل إمبارح، كان حدث هايل بس مش عارف ليه نادي الزمالك عمل الموضوع بشكل سري، الحقيقة هاني بيرزي عضو مجلس الإدارة أقام المتحف على نفقته الخاصة مثلما جدد من قبل غرف ملابس اللاعبين."

وتابع شوبير: "كان لازم الإعلام يتواجد، والقنوات تخش تصور. مستغرب ليه لم يتم توجيه الدعوة للإعلاميين، يا جماعة الحاجات دي فيها شماتة، اللي عايز يطلع يحفل ما يطلع، أنا مستغرب جدًا."

وأوضح شوبير: "كابتن حسين لبيب قال أي لاعب من لاعبي الزمالك عنده حاجة عايز يحطها في المتحف يحطها ده متحف لنا كلنا. يا كابتن لبيب كان المفروض تبعت الرسالة دي للاعيبة من قبلها، تقول مثلاً ده التي شيرت التاريخي لحسن شحاتة، دي جزمة طه بصري، ده جوانتي عادل المأمور، ودي جزمة الكورة بتاعته اللي خدنا بيها بطولة كذا.

واتم: كل ده يبقى جميل، ليه ما رتبناش من قبل الافتتاح؟ وكان لازم كل النجوم يكونوا موجودين. هو أنا عندي مين أغلى من حسن شحاتة، فاروق جعفر، وأسرة الراحل طه بصري؟"