عبّر أحمد رمضان بيكهام، لاعب النادي الأهلي العائد حديثًا إلى صفوف الفريق، عن سعادته البالغة بالعودة إلى القلعة الحمراء، مؤكدًا أنه انتظر هذه اللحظة طويلًا، منذ رحيله عن النادي قبل ثلاث سنوات.

وقال بيكهام في تصريحاته عقب توقيعه رسميًا: "أنا مبسوط جداً بعودتي لبيتي النادي الأهلي. الفرصة دي أنا كنت مستنيها يمكن من يوم ما مشيت من 3 سنين، إني باجتهد وبموت نفسي وبحارب عشان اللحظة دي، فما أظنش إني هضيعها من إيدي، إن شاء الله أبقى قد ثقة الإدارة والجهاز الفني والجماهير، وأقدم موسم كويس إن شاء الله ومزيد من البطولات".

وتابع: "الإحساس ده أوضحه للناس إنه كأنك مسافر بره بلدك سنة أو سنتين أو ثلاثة، وخلاص أنت في المطار وراجع بلدك تاني، فهو دي أقرب حاجة ممكن أوصفها أو الشعور اللي جوايا فأنا مبسوط جداً إني رجعت البيت".

وأشار بيكهام إلى حماسه للمشاركة مع الأهلي في بطولة كأس العالم للأندية المقبلة: "محظوظ إني راجع على فرصة كأس عالم الأندية إني أشارك فيه إن شاء الله، وهاعمل اللي عليا وهاجتهد وأموت نفسي، وأتمنى بس دعم الجمهور لي طبعاً".

وعن المواجهة المنتظرة أمام إنتر ميامي والنجم الأرجنتيني ليونيل ميسي، قال: "إنك تواجه لاعيب زي ميسي أحسن لاعيب في العالم هو وكريستيانو وصلاح دول على المستوى الشخصي باحبهم جداً. إنك تواجه لاعيب زي ميسي طبعاً دي فرصة ما أظنش حد هيضيعها هاعمل اللي عليا، هاعمل أكثر حاجة ممكن أعملها إني أطلع مستوايا كويس، وإن شاء الله نطلع بالمكسب في الماتش ده بالذات، هيفرق معنا جداً إنه أول ماتش والافتتاح، فأنا شايف الفرصة دي مش هتتكرر، وإن شاء الله نكسب الماتش ده".

وأكد بيكهام صعوبة النسخة المقبلة من مونديال الأندية: "النسخة دي أصعب من النسخ اللي قبل كده، إنت بعد المجموعات لسه فيها دور تاني، إنت داخل هتبقى كلها ماتشات صعبة، فأتمنى إن إحنا نصعد للنهائي وناخد البطولة، وكل واحد فينا يعمل اللي عليه وماحدش يقصر، وكل واحد بس يحس إنه من جواه عمل كل حاجة يقدر عليها".

وعن مشاعره تجاه الأهلي خلال فترة رحيله، أوضح: "أي حاجة مثلاً باشوفها للنادي الأهلي، سواء قرعة، سواء إنه صعد في بطولة أفريقيا أو في الدوري، أنا باحس وهم بيقولوا للنادي الأهلي باحس إني لسه موجود مع النادي... فلما جات قرعة كأس العالم أنا حسيت برضه نفس الإحساس، بس ما كنتش متوقع إني هابقى موجود، بس كنت باجتهد على أمل إني أبقى موجود في كأس العالم، الحمد لله رجعت البيت".

وأشاد ببيئة الفريق وزملائه اللاعبين: "اللعيبة اللي في النادي الأهلي كلها لعيبة على مستوى عالي، كلها لعيبة كبيرة... فأنا شايف إن كده كده أي حد هيلعب هيبقى زيه زي اللي ما بيلعبش، كله هنا ليفل عالي وكله هنا مستوى واحد".

كما أشاد بزميله وسام أبو علي: "وسام أبو علي صراحة ليفل مختلف، سواء في التحركات، في الضغط، في الكرات الثابتة، في الرأسيات، في كل حاجة بصراحة ما شاء الله مش عايز أحسده".

واختتم تصريحاته برسالة للجماهير: " طالب دعم الجماهير لي الفترة الجاية، ده هيفرق معايا جداً وهيفرق مع كل اللاعيبة يعني. جماهير الأهلي حابب أقول لهم إن أنتم دايماً في ضهر اللاعيبة، وأنتم اللي دايماً منجحين النادي الأهلي، أنتم رقم واحد، دعمكم بيفرق جداً مع اللاعيبة، فأتمنى إن أنتم تبقوا معنا في ضهرنا في كأس العالم، ونتمنى دعمكم لنا".