علق مودي الجارحي قائد الفريق الأول لكرة السلة "رجال" بالنادي الأهلي على قرار رمضان صبحي بالرحيل عن القلعة الحمراء في الفترة المقبلة ورغبته في الانتقال لنادي بيراميدز.
وكتب الجارحي على حسابه الشخصي عبر موقع التواصل الاجتماعي فيسبوك "انا اسف اني بتكلم في حاجة زي دي والله يمكن اول مرة اتكلم فيها في حياتي علي الفيس بوك و دا مش اسلوبي خالص ربنا يبارك لكل واحد في رزقه".
وأضاف "بس استفزيت بصراحة كل واحد يطلع يقولك عليا التزامات وعايز أمن مستقبلي اولا نفسي اعرف لاعب الكرة بيأمن مستقبله بكام تاني حاجة اللعيبة بتاعت العاب الصالات باسكت ڤولي هاند بول يعملوا ايه بقا.. دا لو في لاعب نجم النجوم واسطورة مش هيعرف يعمل ١٥ مليون جنيه في حياته من اللعب مستحيل مش في موسم واحد".
وتابع "لاعب كرة لما يتعرض عليه ١٨ مليون في الموسم الواحد يقولك النادي مقدرنيش!!!! الموضوع بقا مستفز بصراحة لما يكون جمهورك في منهم بيسافر ورا الاهلي في اي مكان وبيدفع ثمن التذكرة من جيبه عشان يخوش الاستاد وممكن تكون فلوس التذكرة دي اخر فلوس معا ويقول اهم حاجة الاهلي ولو الاهلي كسب بيكون اسعد يوم في حياته ولو الاهلي خسر بيكون اسود يوم في حياته كل دا وهو مش مستفيد حاجة غير حبه وعشقه للكيان".
وأكمل "وانتوا كلعيبة شايفين ١٨ مليون في السنة مش كتير المفروض النادي الاهلي يعمل ايه تاني اكتر من كده لازم تكونوا فاهمين ان كده كده النادي الاهلي عمروا ما هيقف علي لاعب في اي لعبة في النادي الاهلي مش كرة بس و مهما كان اسم الاعب بس حب الناس و الانتماء دا بفلوس كتير اوي اوي غير ان النادي الاهلي بيعرض ارقام وعقود كبيرة جدا و تأمن مستقبل اي لاعب بس الطمع و الجشع في الزمن دا هما المسيطرين علي لعيبة الكرة".
وواصل "اهم حاجة في الدنيا انك تعيش مبسوط وراضي مش كل حاجة فلوس والله اقسم بالله الكلام دا بجد مش شعارات مشكلة اللعيبة دي ان بيلعبوا من غير جمهور لو كان في جمهور كان كل واحد عرف حجمه.. انا واحد اتولدت في النادي الاهلي وانا عندي سنة كنت برووح النادي الاهلي الحمد الله عارف معني الانتماء ايه عارف يعني ايه النادي الاهلي وشرف اني بلعب في النادي الاهلي و عمري ما في حياتي اقدر اساوم النادي الاهلي عشان النادي الاهلي خيره علينا كلنا و لو بملايين الدنيا اقسم بالله".
وأردف "عمري ما اتخيل اني ممكن اكون في مكان غير النادي الاهلي اه طبعان الفلوس مهمة جدا في الزمن دا بس لازم تقول الحمد الله و تكون راضي و تكون عارف ان في ناس بتشتغل ١٨ ساعة في اليوم عشان يعرفوا يكلوا و يشربوا و انتوا بتلعبوا ماتش لمدة ساعتين".
وأتم مودي الجارحي حديثه "مش عاجبكوا ١٨ مليون في السنة، الكل زائل وسيظل النادي الاهلي فوق الجميع بتاريخه وانجازاتها وبطولاته".