تحدث شوقي غريب المدير الفني للمنتخب الأوليمبي عن تصريحات عمار حمدي لاعب الأهلي والمعار لفريق الإتحاد السكندري بأنه يأكل بشكل كبير قبل إنطلاق المباريات.

وقال شوقي غريب في تصريحات لإذاعة اون سبورت اف ام بأنه يالفعل عمار حمدي له نظام خاص بعيدا عن لاعبي المنتخب الأوليمبي: "عاملين الغدا الساعة 4 والمباراة الساعة 9.00 وانا بابلغ اللاعيبة، عمار قاللي مش هاقدر استحمل 5 ساعات قولتله طيب هقولك على فكرة، من 4 هناكل وهاسمحلك تاكل الساعة 6.00 هجيبلك ساندوتشات ولما تروح الملعب الساعة 7.30 هتلاقي فاكهة وكيك وشاي الساعة ربنا رزقك كده".

وأضاف: "لازم يتعمله تحليل يشوفوا الوضع اللي عنده ايه انا باتعامل معاه هو طيب جدا، معندوش حاجة بيخبيها، انت شايف واكل قد ايه وبيجري ويشترك، كذا لقطة يفوت من لاعب البرازيل ويتعرض للضرب".

وتابع المدير الفني للمنتخب الأوليمبي: "فيه سيستم للنوم والأكل، بس فيه لعيبة ليها حاجات خاصة، النهاردة مفيش أكل بعد الساعة 12.00 ولا سهر، سألت الدكتور أيمن زين ودكتور تغذية قالوا نعمله تحليل بس بلاش نضغط عليه يمكن تكون حالة نفسية".

واختتم شوقي غريب تصريحاته عن عمار حمدي: "مش بياكل حاجة تقيله، قبل ماتش البرازيل عملناله سندوتشات كفتة وبانيه الساعة 6.00 مش أكل طواجن حاجات نواشف فيها بروتين".

وكشف عمار حمدي في وقت سابق عن طقةش خاصة قبل المباريات: " قبل أي ماتش لازم معدتي تكون مليانة معرفش العب ومعدتي فاضية لازم أدبها لازم بطني مليانة، كنت باكل مكرونة وفراخ وشيكولاتة وتفاح، وكنت استأذن من شوقي غريب يسيبني آكل، وماتش جنوب أفريقيا اللي خدت أحسن لاعب قعدت بعد ما اللاعيبة تطلع ربع ساعة لوحدي في البوفيه".

وتابع عمار: "لما كنت في الأهلي كنت ماشي بنظام غذائي،بأكل بس مش بيبان عليا بعد العشاء بكون واخد رز بلبن وتفاح ومعايا اكل الغرفة، بأكل في اليوم 3-4 كل وجبة نص فرخة ومكرونة وفي الفترات اللي بينهم كبدة وسجق وأفوكادو".