تحدث محمود عبد المنعم كهربا لاعب النادي الأهلي لأول مرة عن كواليس مشادته الشهيرة مع مرتضى منصور الرئيس السابق لنادي الزمالك قبل احدى مباريات القمة في الدوري المصري.
وقال كهربا في حوار تلفزيوني مع قناة اون تايم سبورت أمس الأحد "انا اكتر لاعب اتشتم في نادي الزمالك، ابقي لسة جايب جول مثلا ويجي فينا التعادل الاقي الناس في المدرج بتشتمني أنا رغم اني مسجل الهدف وبلعب كويس".
وأضاف "مشاكل كتير حصلت بيني وبين رئيس النادي، مشكلي كانت معاه انه دايما وهو بيتكلم مع اللعيبة في وجود الكاميرات لازم يتكلم عني ويجيب سيرتي رغم ان علاقتي بيه كانت كويسة وكنت بقوله يا بابا، كان بيتسجيب لحاجات كتير بطلبها منه".
وتابع "الي حوالين مرتضى سخنوه عليا كتير، وحصل صدام كتير بيني وبينه، قبل ماتش الأهلي في برج العرب كان جايب لعيبة الزمالك القدامى كلهم ولسة مخلصين تمرين وكان في 4 كاميرات بتصور وبيتكلم عادي معانا".
وأستكمل كهربا "فجأة لقيته بيقولي وانت يا عم كهربا لو حد شتمك بأبوك أو أمك اوعى بقى تتجنن وتتعفرت وتعمل الحركات بتاعتك دي، قولتله بعد اذنك الكلام ده يتشال علشان ابويا وامي بيتفرجوا على اللقاءات دي في قناة الزمالك وبيزعلوا، قالي انت هتشوحلي وبدأ يزعق؟".
وأردف "قولتله اها هشوحلك وهعمل كذا وكذا وسبته ومشيت وقعدت اشتم جامد وانا ماشي، دخلت اوضة اللبس بلم حاجتي لقيته واقف على باب الأوضة بيقولي تعالى معايا انا عاوزك وطلعت معاه المكتب".
واختتم كهربا تصريحاته "وانا ماشي معاه اتصلت بابويا علشان يسمع كل حاجة بتتقال، بصراحة اللعيبة مسابتنيش، طلعنا المكتب جالي عصير لمون وقالي متزعلش مني انت زي ابني".