ضربة.. سطرت اسمها في سجل التاريخ، وكتبت بحروف من ذهب واحدة من أهم ليالي جماهير الأهلي، ولا تعرف هل ميزتها في توجيه لقب مهم ناحية الجزيرة.. أم فوز ثمين على غريم تقليدي.. أم اغتيال حلمه في تحقيق السادسة.. أم في كونها فقط "ضربة قاضية" ؟ .
اسئلة عديدة تدور في ذهنك كلما تعيد مشهد استلام محمد مجدي أفشة لكرة عائدة من محمود علاء، وتبتسم عند ارتطامها بالقدم اليمنى للاعب رقم "تستعتاش".
في ماذا كان يفكر أفشة ؟
هل هي صدفة ؟
هل أحد كان يتوقع ذلك ؟
كيف ذهبت بهذه الدقة لتلك الزاوية ؟
لماذا ارتدى أفشة شارة سوداء في يده دونًا عن بقية لاعبي الأهلي ؟
ماذا كان يدور في ذهن الجهاز الفني واللاعبين ؟ ماذا كان يدور في ذهني أنا المشجع ؟
ثم يبادرك السؤال الأهم .. لماذا لا أشعر بالملل من إعادة هذا المشهد ؟
El-Ahly.comقام باستعادة ما قاله أفشة وموسيماني في الأيام التي تلت التتويج بالتاسعة. لعل فرحتنا حينها بالقاضية جعلنا لا نهتم بالإجابة على تلك الأسئلة.. ولكن الآن أصبح من المهم أن نكتشف أن كل ذلك لم يكن صدفة.. بل كانت واقعة مُدبرة في الجزيرة وتم تنفيذها في ستاد القاهرة، وكانت تحتاج فقط لتوفيق الله.
أفشة أوضح خلال تصريحاته أنه تدرب على هذه الكرة أكثر من مرة، بل وقام بتنفيذها مرتين خلال الشهر الذي سبق موعد مواجهة الزمالك، مُشيرًا إلى أن كل ذلك كان بالاتفاق مع بيتسو موسيماني، المدير الفني.
كشف أفشة أنه شعر بقلق موسيماني قبل لقاء نهائي القرن، وهو ما دفعه للتحدث معه قبل 3 ساعات فقط من موعد اللقاء، ليتفاجأ برد من المدرب الجنوب إفريقي جعله يرتبك ويذهب سريعًا دون أن يكمل حديثه.
وفي السطور التالية يستعرض El-Ahly.comأهم التصريحات التي أدلى بها موسيماني وأفشة عقب اللقاء، وتكشف "كواليس القاضية".
تدريب
أفشة عبر بي إن سبورتس بعد المباراة مباشرة:
مخدتش قرارين ؟ مفيهاش تردد دي، ماتش الوداد نفس الجول، ماتش مصر وتوجو نفس الجول، أنا بتمرن دائمًا مع المدرب في الأهلي بنفس الطريقة. أضغط والمدافع بضهره، طول ما هو بضهره هو مش شايفني.
في ماتش المنتخب خدتها وشوطتها، وماتش الوداد نفس الأمر.. هي تدريب، أنا بتمرن وبركز وبعمل اللي المدرب بيقولي عليه، ناس كتير انتقدت افشة لكن انا مبسمعش.
أفشة عبر تايم سبورتس الأرضية بعد المباراة:
قرار التسديد ؟ الحمد لله ده تقريبا تالت جول بنفس الطريقة اخد الكورة التانية واشوطها، دي بتاعة ربنا مع التعب والتمرين مع المدرب اللي دائما عاوزني اضغط واخد الكورة التانية، ده اغلى جول في حياتي خلاص.
أفشة عبر قناة الاهلي في اليوم التالي:
طول الموسم شايط 12 كورة في العارضة ومضيع ضربتين جزاء وحوالي 10 انفرادات، أنا عامل فيديو ليا بالحاجات دي بتفرج عليه دائمًا، واتعلمت من الحاجات دي.
إحساس ويقين
أفشة عبر قناة الاهلي في اليوم التالي:
بعد الشوطة اللي شوطتها فاول حسيت إني هجيب جول، أنا في الماتش مكنتش موفق أوي، ومكنتش fitزي الماتشات اللي قبل كده، لكن بعد ما شوطت الفاول حسيت إني هجيب الكورة دي، حسيت إني قريب.
هدفي في الزمالك ده أغلى جول في حياتي، البطولة بعيدة عن الأهلي 7 سنين وكل الجمهور كان مستنيها، الشوطة اللي قبليها ادتني دفعة اني اشوط، بعد شوطة الفاول قلت ان شاء الله هجيب جول بين وبين نفسي.
دور السولية
أفشة عبر قناة الاهلي في اليوم التالي:
السولية قعد يقول لازم نتعب عشان نكسب، اللي مش هيتعب آخر 10 دقايق دول مش هيكسب، اللي هيتعب هو اللي هيكسب، وفعلا احنا كنا بنجري وخلاص، مبنلعبش كورة، بس بنجري وبنضغط، فربنا كرمنا.
كان بيقول كده في اخر 10 دقايق.. الكورة وقفت عشان لاعب من الزمالك وقع، فراح جايبني وقالي يا افشة مش هنكسب غير لما نتعب، لازم نتعب عشان نجيب جول، لو متعبناش ربنا مش هيكرمنا، اللي هيتعب اكتر هو اللي هيكسب.
دور موسيماني
أفشة عبر أون إي بعد أيام من المباراة
مش هقول على موسيماني مدرب كويس، لأ، هو مدرب عبقري، فيه فرق بين المدرب الكويس والمدرب العبقري، الفكر والمحاضرة والطريقة ومذاكرة الخصم كويس.
مفيش لاعب في الزمالك متفرجناش عليه، عملنا فيديو لكل لاعب في الزمالك، واحنا معانا فيديوهات على تليفوناتنا بنتفرج على كل لاعب في الزمالك، يعني أنا كنت عارف إن طارق هيلعب عليا، جبت كل فيديوهات طارق على تليفوني، وشوفته هو بيتحرك ازاي.
رؤية أبو تريكة
أفشة عبر قناة الأهلي في اليوم التالي من المباراة:
روحت بعد الماتش احتفل مع أهلي في البلد، اتفاجئت لقيت أمي بتقولي إنها صلت الفجر وأبو تريكة جالها في الحلم بعدها، وقالها محمد هيجيب جول النهاردة.. مرضيتش تقولي قبل الماتش، قالتلي بعد الماتش، عشان مكانتش عاوز توترني.
قلق موسيماني
أفشة عبر قناة أون إي بعد أيام من المباراة:
كنت بتكلم مع موسيماني قبل الماتش الساعة 6، وقفت معاه وجبت المترجم، عشان كانت أول مرة اشوفه في محاضرة يتكلم كتير، هو مش من طبيعته يتكلم كتير، وقفت معاه قولتله انت قلقان ؟
قالي لأ أنا مش قلقان، وسألني هل أنا اللي قلقان ؟ قولتله لأ، أنا مبقلقش من الكورة، مش بخاف من الكورة بس بحترم اللي قدامي.
قالي أنا جاي هنا عشان أعمل تاريخ، وانت معايا أنا هعمل تاريخ، انا سكِت وسيبته ومشيت، عشان كده بقول هو عبقري، بيعرف يطلع من اللاعب اللي عاوزه، انا متوقعتش الرد ده منه.
شارة سوداء
أفشة عبر تايم سبورتس الأرضية بعد المباراة:
أهدي البطولة دي لجماهير الأهلي والخطيب ومؤمن زكريا، وطبعا صاحبي وأخويا وحبيبي عمي عصام من بلدنا، توفى من اسبوع او 10 أيام بالتحديد.. البطولة دي ليه هو، عشان كده أنا لابس شارة سودا، وببوسهاله أهو.
بيتسو موسيماني عن القاضية عبر فيلم سر التاسعة:
لقد رأيت في آخر مواجهتين الأهلي لعب أفضل من الزمالك، ولكننا خسرنا المباراتين، قلت للاعبين لن نفعل الشيء نفسه مرةً أخرى، نحتاج إلى طريقة اخرى، وهذا ما فعلناه.
بين الشوطين قلت للاعبين هذه مباراة صعبة، لكن هل تتوقعون أن الفوز بدوري أبطال إفريقيا سيكون سهلًا ؟ لذا قمنا بكثير من التغييرات، الطريقة التي نلعب بها، والطريقة التي نمرر بها الكرة.
حاولنا الاستحواذ على الكرة، لكن بشرط ألا نحول اللقاء إلى معركة، بل لنجعلها مباراة استحواذ على الكرة، ونحاول الحفاظ على الكرة أطول وقت ممكن.
طالبت كل لاعب بأن يكون صبورًا والكرة بحوزته، وألا يمررها، وستظهر المساحات بعدها، وحينها سيمكنه التسجيل.
إنها مثل مباراة الملاكمة، عندما ترى منافسك يتراجع إلى أحبال وأركان الحلبة، حينها لابد أن تقضي عليه.
طالع أيضًا:
كواليس القاضية- معتز إينو: هناك تشابه بين هدفي وهدف أفشة.. الإثنين في الزمالك
تنبأوا بالقاضية وتوقعوا النتيجة.. مشاهد كوميدية لا تفوتك من مسرحية ما قبل القاضية
كواليس القاضية - أحمد صلاح: لم أستطع الوصول لأصدقائي الزملكاوية.. أغلقوا هواتفهم واختفوا
كواليس القاضية - سيد معوض: فريق ناشئي الأهلي حولوا منزلي إلى مدرج وأصبحت ضيف وسطهم