صلاح يفتح النار: تسببتم في انقسام المنتخب.. وهذه رسالتي لجماهير الأهلي والزمالك



فتح محمد صلاح، قائد المنتخب المصري النار على بعض أطياف جماهير الكرة المصرية في الوقت الحالي، مُشيرًا إلى أنهم تسببوا في حالة انقسام داخل المنتخب.

وقال صلاح في تصريحات بالمؤتمر الصحفي قبل لقاء كوت ديفوار: "أنا سعيد مع اللاعبين بنسبة 100% وعلاقتي بهم جيدة جدًا، (مفتكرش إن حد اتكلم عليا كلمة وحشة أو أنا اتكلمت على حد كلمة وحشة) ".

وأضاف نجم ليفربول الإنجليزي: "في الملعب أحاول مساعدة اللاعبين قدر المستطاع، ووفقًا للخبرات التي اكتسبتها داخل أو خارج مصر، وأحاول منح المنتخب كل ما في وسعي".

وتابع:" (بحس ان فيه ناس شوية مستنية اي حاجة عشان تتكلم على صلاح أو لاعيبة تانية. دلوقتي عايشين في عصر السوشيال ميدا. الجماهيرية بتاعة المنتخب مبقتش موجودة زي الأول. الناس بقت تشجع الأندية واللاعيبة ودي حاجة مكانتش موجودة في الأول) ".

وواصل:" (دي حاجة قسمت المنتخب والكرة المصرية، فيه صفحات معمولة عشان تدافع عن لاعيبة او أندية، هما فاكرين انها حاجة كويسة، بس هي مش حاجة كويسة) ".

وأكمل:" (انت ممكن متضرش صلاح عشان انا مريت بالحاجات دي، بس فيه لاعيبة تانية جاية صغيرة، ده كله هيضرها وبيخلي اللاعب مركز على نفسه بس وخلاص) ".

وأردف:" (أنا مش باجي هنا عشان اتهم حد بحاجة أو اخلي الناس تتكلم بعد المؤتمر، ويقعدوا يقولوا بُص صلاح بيقول ايه او مبيقولش ايه. بس نصيحة لو انتوا شايفين إني نجحت بره في الاحتراف خليكوا ورا منتخب مصر ومتشجعوش لاعب بعينه أو نادي بعينه) ".

واستطرد:" (يعني بتوع الأهلي ميشجعوش الأهلي ويفضلوا يتكلموا على لاعب واحد على مدار البطولة، وبتوع الزمالك ميشجعوش الزمالك، نفس الكلام لو حد بيحب صلاح متتكلمش على صلاح طوال البطولة) ".

وواصل:" (ميبقاش كل همك بص روح اللاعب الفلاني عامله ازاي. إحنا منتخب مصر، عشان نكسب لازم اللاعيبة كلها يبقى واصلها احساس ان الجماهير كلها وراها ومش بيدوروا إن اللاعب بتاعهم كويس وخلاص) ".

وأشار:" (أنا مريت بحاجات كتير وفي المنتخب بقالي 10 سنين، فيه ناس تانية ممرتش بده وجديدة وصغيرة وهما المستقبل.. خليكوا ورا المنتخب وشجعوه وخلوا فيه جمهور تاني للمنتخب زي زمان. ده بيخلي اللاعب يقول لو المنتخب مخادنيش فيه صفحات هتطلع تهاجم المنتخب وهيطلعوا يتكلموا عليا، وده مش من مصلحة اللاعب) ".

كلمات صلاح النارية لم تتوقف عند ذلك الحد، إذ أكمل:" (لو انت بتحب مصر والمنتخب لازم تشجع المنتخب ومش لاعب بعينه. انت كده بتدي قوة للاعب إنه مش فارق معاه أي حاجة وحاسس إنه هو مهم عن المنتخب، ومفيش حد أهم من المنتخب، لا أنا ولا غيري ولا أي نادي، لما نيجي كلنا المنتخب يبقى اتت بتشجع المنتخب بس) ".

وأتم صلاح:" (ياريت الناس اللي في الاستديوهات نتكلم على المنتخب مش فرد أو اتنين. أنا ممكن مش بتابع. بس انا متأكد ان فيه لاعيبة صغيرة بتتابع وده بيأثر فيهم. ياريت الناس اللي في مصر تشجع المنتخب ايا كانت الظروف كويسين وحشين لحد ما البطولة تخلص، فيه لاعيبة ملعبتش كأس الأمم اللي فاتت، ليه دايس في الناس كلها ؟) ".

استطلاع الراى


نهائي دوري أبطال أفريقيا بين الأهلي والوداد المغربي؟
دوري أبطال أفريقيا - 2021/2022

الفيديوهات الأكثر مشاهدة خلال شهر