شن طه إسماعيل المحلل الفني بقنوات أون تايم سبورتس هجومًا عنيفًا على الجنوب إفريقي بيتسو موسيماني المدير الفني للنادي الأهلي بعد خسارة لقب دوري أبطال أفريقيا بعد الهزيمة أمام الوداد بهدفين دون رد.

وقال طه إسماعيل خلال حديثه عبر قناة أون تايم سبورتس: " الأهلي في أفريقيا السنادي خسر من صن داونز رايح جاي وكسب الهلال مرة واتعادل مرة وكسب المريخ مرتين بمنتهى الصعوبة وبعدين في الدوري خسر 9 نقط في 4 مباريات".

وأضاف: "اللعيبة مجهدة؟ من ايه ده كان بيدي 8 و10 أيام راحة، الفريق بدنيا واقع بدليل انه مش قادر يقاوم الفرق اللي لاعبها الموسم ده، واضح من البداية أنه موسم خسران، الفريق بدنيا وتكتيكيا قليل جدا خلاف تدخلاته في التشكيل وتغييراته، في لعيبة تدمرت ثقتها في أنفسها من خلال ركنتهم زي أفشة وشريف على طول مستبعدهم مش بيلاعبهم متأثرين نفسيا بتيجي تلاعبه بعد كدة خلاص هو مش واخد ثقة المدرب".

وأكمل: "انهاردة في حاجات اللاعيبة مسئولة عنها في اهدار بعض الفرص وكلام من هذا القبيل، لكن اللعيبة مش قادرة بدنيا تجاري فريق الوداد اللاعيبة مش فايقة ماتشات الدوري دليل على ده، الماتشات اللي خسرها أو كسبها في الدوري زي إنبي الأخيرة اللعيبة مش قادرة".

وواصل: "بداية مباراة الوداد سيئة جدا ايه الفكرة اللي عنده أول تلت ساعة في الماتش ياسر يباصي لأيمن ونتيجة لهذا كنا مضغوطين بدل ما نضغط الوداد ونخوفه ده هو كان كاشش وخايف، تلت ساعة الأهلي مش عارف يطلع من الـ 18 هو بيلاعبهم بطريقة هما مش قادرين عليها الاتنين المدافعين مش لعيبة كورة انهم يمشوا بالكورة ويباصوا".

واستطرد: "موسيماني لازم ميكملش هو كمل علشان وصل لنهائي افريقيا هو في الدوري مش ماشي.. لا ميستمرش .. السنة اللي فاتت خسرنا الدوري ازاي؟ كنا متقدمين 4 نقط على الزمالك ابتدا يتعادل اتعادل مع بيراميدز والبنك الأهلي والإسماعيلي وطلع كل الماتشات تعادل بعد ما يكون كسبان يتعادل في الاخر لحد ما خلص كل نقاط الفريق هذه الظاهرة كانت في اخر 8 مباريات انهاردة باينة في الدور الأول 9 نقط في 4 مباريات".

وأتم طه إسماعيل حديثه: "باين من دلوقتي انك في الدوري متعثر هو خلاص مش قادر لازم يمشي مدته انتهت يدفعولوا الشرط الجزائي ويمشي هو مش هيكسب الدوري ابدا بالمنظر ده".