علق محمد بركات نجم النادي الأهلي السابق على حضور رباعي الفريق محمد مجدي أفشة وأيمن أشرف وحسام حسن وياسر إبراهيم لأحد الأفراح منذ يومين.

وتواجد رباعي الفريق الأول في إحدى حفلات الزفاف أول أمس الخميس، بعد يوم واحد فقط من خوض لقاء الجونة، وقبل أقل من 24 ساعة من الدخول في معسكر مغلق استعدادًا لمواجهة المقاولون العرب.

وقرر سيد عبد الحفيظ، مدير الكرة، توقيع غرامة مالية على كل من أيمن أشرف ومحمد مجدي أفشة وياسر إبراهيم وحسام حسن، رباعي الفريق الأول، لما بدر منهم في الساعات الماضية.

وقال محمد بركات في تصريحات عبر برنامجه أمس "كل واحد له حياته الشخصية ده أكيد وكل واحد له الناس الي بيحب يقف يجاملها في الشدة قبل الفرح، واللاعب إنسان في الآخر، من حقه يجامل ويتبسط ويفرح مع قرايبه وأصحابه".

وتابع "احنا منقدرش نلوم اي لاعب او بني آدم على ده، لكن الفكرة في الموضوع ده ان الخطيب عنده كل الحق في التحقيق مع اللاعبين وتغريمهم لإن التوقيت مختلف".

وأضاف بركات "كرة القدم في الأندية الكبيرة أوقات كتير بتكون الدنيا ماشية حلوة وأحسن حاجة ووقتها الناس مش بتراجع او تركز جامد، لكن في أوقات في الكورة مش بيكون وقت مثالي أو ألطف حاجة ودي الفترة الحالية في الأهلي".

وواصل "حضور فرح سواء بقى في القاهرة ولا الأسكندرية ولا في أي مكان مش دي المشكلة، لكن في ظل الأجواء الحالية من انتشار فيروس كورونا والغيابات في صفوف الفريق كان لازم كل واحد يحمي نفسه وفرقته".

وأردف الزئبقي "في نفس الوقت مظهرك قدام الجمهور لازم تحافظ عليه، لما تكون فترة صعبة لازم تبقى الدنيا هادية حواليك وتشوف ايه الي ممكن تعمله اني اكون في كامل تركيزي خصوصا لو فاضل 7 ولا 8 مباريات على انتهاء الدوري وانا في المركز الثالث وعاوز ارجع بطولة الدوري الي خسرتها في وجود منافسة مع فريقين بينافسوا".

متابعًا "الجمهور لازم يوصله ويحس بانك مركز، من حقك كإنسان تروح وتجامل لكن المشكلة في التوقيت والظروف".

مضيفًا "مثلا على سبيل المثال، بيرسي تاو لم يكتمل شفاءه وموقفه مش متحدد، ومحمد شريف مصاب، مفيش حد موجود في الهجوم غير حسام حسن، لكن حسام لما يروح يخاطر لو لا قدر الله حصله حاجة وتم استبعاده هتبقى مشكلة كبيرة جدا للفريق، الإصابات في الاهلي كتير".

وأختتم محمد بركات تصريحاته قائلًا "الجمهور دائمًا وأبدًا داعم، لكن الجمهور لازم يوصله ان في التزام، مينفعش اوصل للجمهور ان الدنيا مش في دماغي، عمرك ما هتروح فرح مش هتلاقي صور نزلت، واي حد هيقابلك هيتصور معاك وهينشرها على طول، حق الناس في النادي الأهلي تزعل وتضايق وان الموضوع يكبر".