أكد محمود عبد المنعم كهربا لاعب الفريق الأول لكرة القدم بالنادي الأهلي، أن محمد صلاح قائد منتخب مصر ونجم ليفربول الإنجليزي تعرض للظلم بعد إصابته في كأس أمم إفريقيا الأخيرة.
وقال كهربا خلال حديثه عبر قناة القاهرة والناس: "محمد صلاح قريب مني جدا شخصية جميلة ولعيب كبير استفدنا منه في أمم إفريقيا كتير هو اتظلم في موضوع الإصابة والكلام عندنا في مصر في برامج كتير مش بتلاقي حاجة تبني عليها موضوع ساعة لما كانوا ماسكني سنتين ورا بعض".
وأضاف: "فهما طلعوا كل يوم والكلام على صلاح وهو معملش حاجة الراجل اتصاب وأول مرة في حياته يتصاب إصابة عضلية لعبنا الراس الأخضر الماتش التالت في المجموعة قعد معانا واتكلم معانا في محاضرة أنه لازم يتعالج في إنجلترا علشان يرجعلنا على النهائي أو قبل النهائي هو كان صريح جدا معانا واتعامل معانا بكل حب فمحدش يظلمه".
وواصل: "محمد صلاح أسطورة دايما بدافع عن صحابي القريبين مني جدا لازم صلاح ياخد حقه يا جماعة أنتوا بتتكلموا على مين؟ الشارع المصري يعمل اللي هو عاوزه ويعمل اللي هو عاوزه ده جمهورنا لكن الناس اللي بتطلع في التلفزيون أيا كان الأسامي أنتوا عارفين بتتكلموا عن مين؟ أنتوا بتتكلموا عن صلاح ده عاملنا قيمة احنا بسببه في أي بلد بنتعامل احسن معاملة".
واختتم كهربا حديثه: "محمد صلاح فخر وأسطورة فلازم نتباهى به".