عبّر النجم محمود حسن تريزيجيه عن سعادته الكبيرة بعودته لصفوف النادي الأهلي، مؤكدًا أن انتماءه للنادي لم ينقطع يومًا، وأنه ظل متابعًا وداعمًا للفريق في كل البطولات، حتى أثناء احترافه بالخارج.

وقال تريزيجيه:"أنا مش بفوت أي ماتش للنادي إلا لو في ظروف أو بلعب ماتش.. ودائمًا لما الأهلي كان بياخد بطولة، كنت بقول لنفسي: أنا ابن النادي."

وأشار إلى أن العودة لبيته بعد سنوات من التألق في أوروبا تمثل شعورًا لا يمكن وصفه، قائلًا:"كل موسم مع الأهلي ليه طعم تاني، سواء الموسم الحالي أو الجاي أو اللي بعده، الأهلي ليه إحساس مختلف، وبيتي اللي دايمًا كنت فخور إني أنتمي ليه."

وتحدث تريزيجيه عن حمل شارة القيادة، فقال:"بالنسبة لأي لاعب، شرف كبير إن يكون كابتن في النادي الأهلي. والمميز هنا إن كل اللاعيبة عارفة قيمة النادي، وده بيخلي الفريق قوي ومتّحد."

وتابع: "اللعيبة الكبيرة موجودة في كل الفرق، بس الأهلي دايمًا ميزته إنه فريق مش لاعب، دايمًا بروح الجماعة. ودي الحاجة اللي بتفرقنا عن أي حد تاني."

وأكد:"أنا مش راجع علشان ألعب كده وخلاص، نفسي ناخد البطولة إن شاء الله. خطوة خطوة، من أول ماتش لآخر ماتش، وأنا واثق إننا نقدر نوصل لآخر يوم في البطولة."