تحدث حسام غالي، قائد الأهلي السابق، عن تجربته مع الأسطورة الهولندية رود خوليت خلال فترة احترافه في أوروبا، مؤكدًا أن اللعب تحت قيادته كان بمثابة حلم تحقق له، خاصة أنه أحد أساطير ميلان في العصر الذهبي.

وقال غالي عبر بودكاست "جي توكس": "أنا من الجيل اللي كان بيحب ميلان بتاع فان باستن ورود خوليت. كنت بتفرج على القناة التانية زمان وبحب ستايله وشكله، فكوني أتمرن معاه كان حاجة كبيرة جدًا بالنسبة لي، وهو كان بيحبني ويتكلم معايا كتير."

وأضاف: "خوليت كان دايمًا يقولي تلعب السهل، متجريش كتير، الكرة هي اللي تتعب مش انت. يقولي لو لعبت السهل هتلعب الكرة وانت ماسك سيجار في إيدك. حتى في التمرين كان يطلبني ألعب مع الفريق الخسران عشان يوريني إزاي بفرق في الملعب."

وعن الفيديو المنتشر لخوليت وهو يتحدث عنه، أوضح غالي: "هو قال إمكانياتي الفنية والبدنية عالية لكن المينتالتي مختلفة. أنا عمري ما كان عندي عقلية وحشة، بالعكس، دايمًا المينتالتي بتاعتي مظبوطة، جوه الملعب وبرا الملعب عايش للكورة وبعمل اللي عليا وأكتر، عشان كده الكلام ده ما ضايقنيش."