كشف محمد هاني، لاعب النادي الأهلي ومنتخب مصر، تفاصيل استعداده لمواجهة البلجيكي جيريمي دوكو، جناح منتخب بلجيكا ومانشستر سيتي، مؤكدًا أنه قضى أسبوعًا كاملًا في دراسة تحركاته قبل المباراة، إلى جانب الاستفادة من نصائح عمر مرموش.

وقال هاني، خلال ظهوره على قناةMBC مصر: "قعدت أسبوع كامل بذاكر دوكو، وبشوف بيعمل إيه، وحتى كلمت عمر مرموش، وقالي شوية نصايح عن تحركاته، إمتى بيطلع بره وإمتى بيدخل لجوه، لكن في الآخر لازم أنت اللي تطبق في الملعب، وده صعب مع لاعب بالمستوى ده، والدوري الإنجليزي كله بيعاني قدامه."

وأضاف: "كنت نازل مركز معاه كويس جدًا، وعارف هو بيعمل إيه، وحتى لما غيّر مركزه وبعت لاعب تاني، قلت مفيش مشكلة.. مش هيعدي. أنا بطبيعتي عندي روح التحدي، ولو قلتلي هات أحسن لاعب في مركزه هقوله هاته، لأني بحب التحديات."

وتابع: "قبل كده لعبت قدام فينيسيوس مع ريال مدريد في كأس العالم للأندية، وقتها كانوا أبطال أوروبا وأحسن فريق في العالم، وكان تحدي مختلف لأنه سريع جدًا ومهاري، لكن برضه ذاكرت تحركاته بنفس الطريقة."

واختتم محمد هاني تصريحاته قائلًا: "نفسي الناس تعرف إن أي حد عنده طموح يقدر يحقق اللي نفسه فيه، بشرط يجتهد ويذاكر اللي قدامه ويعرف نقاط قوته وضعفه، وبعدها يتوكل على ربنا ويشتغل."