كشف محمود عبد المنعم كهربا عن كواليس رحيله عن صفوف نادي الزمالك إلى فريق أفيش البرتغالي ومحاولات مسئولي الزمالك اعادته مرة أخرى بعد نهاية تجربة احترافه وقبل الانضمام لصفوف النادي الأهلي.

وقال كهربا في تصريحات تلفزيونية عبر قناة اون تايم سبورت أمس الاحد "قعدت في شهر 12 مع مسئولي الزمالك وكان عقدي 2 مليون جنيه، قالوا اني ببص لرزق زمايلي علشان طلبت ان عقدي يبقى 20 في السنة الواحدة".

وتابع "عقدي كان 2 مليون جنيه تقريبًا ومع ذلك دخلت للزمالك 85 مليون جنيه مقابل اعارتي للدوري السعودي، هبص للعيبة في رزقها ازاي وانا كنت بساعد فيهم ناس أحيانًا وكلهم صحابي".

وأضاف "بعد ما طلبت الـ 20 مليون قالولي هنتكلم بعد افريقيا، وبعد افريقيا محدش أتكلم معايا في حاجة، لما غيبت يوم واحد عن التمرين لقيتهم بيكلموني بيقولولي تعالى هتاخد الي انت عاوزه قولتلهم لا خلاص الموضوع اتقفل، كان في الفترة دي رئيس الزمالك طلع شتم فيا".

واستكمل "لما رجعت من البرتغال، كلموني في الزمالك من بعيد لبعيد وانا في معسكر المنتخب، كانوا عاوزين يعرفوا انا مضيت للأهلي أو بيراميدز ولا لسة".

وواصل كهربا تصريحاته "وقتها اتعرض عليا 50 مليون جنيه في الموسم مقابل إني ارجع الزمالك وحاولوا معايا لكن قولتلهم صعب".

مختتمًا تصريحاته "قولتلهم صعب، انا كل يوم وانا برة مصر كان التلفزيون كله عبارة عن شتيمة في كهربا كل شوية".