حرص محمود الخطيب، رئيس مجلس إدارة الأهلي على توجيه كلمات ورسائل هامة للاعبي الفريق الأول عقب نهاية مباراة الجونة والمنافسة على لقب الدوري هذا الموسم.

وعقد الخطيب جلسة مع لاعبي في دائرة منتصف ملعب خالد بشارة، حيث استهل كلماته قائلًا :"انا جاي مخصوص عشان انا عايز بعد الماتش اقولكم اني بشكركم جدا وبشكر كل واحد فيكم، انتوا والجهاز بتاعكوا، الموسم ده صعب جدًا".

وأضاف :"يمكن مواعيده واللي احنا فيه ده متكررتش في اي حتة في العالم، انتوا اتعرضتوا لإجهاد، مش بس إجهاد بدني، إجهاد بدني وذهني، ده اكتر موسم في العالم فيه بطولات، كم البطولات اللي انتوا مريتوا بيها ده خلى عندكم إجهاد ذهني قبل البدني، وإحنا كإدارة مقدرين ده جدًا".

وتابع :"جمهور الاهلي شايف وعارف واعي وفاهم اللي بيحصل، عشان كده متأكد أنه في ضهركم، اللي حصل السنادي انتوا السبب ان الناس بقت سعيدة وفخورة بيكم وبالأهلي".

وواصل :"الأهلي لما بيفقد بطولة الأهلي بينطلق منها، البطولات جايه كتير وعندنا بطولات كتير، لازم تبقوا فاهمين ده ولازم تفرحوا جمهوركم اللي معاكم وفي ضهركم".

وأكمل :"كمان في ظروف خارجة عن إرادتنا وإرادتكم بس احنا كمان في اللحظة دي لازم نكون بنفكر ليه في بعض المباريات احنا كان يجب تركيزنا يبقى أكتر شوية، والتزامنا يبقي زيادة، بس دي الكرة".

وواستطرد :"بكرر شكري ليكم وكلكم محل ثقة كبيرة مننا، وعاوز اقولكم أوعوا تنسوا أنكم حققتوا رباعية وأبطال أفريقيا مرتين ودي مبتحصلش كتير، أنتواحققتوا رباعية واخدتوا برونزية لتاني مرة، وانتوا أبطال السوبر متنسوش ده، أرفع راسك إنت أهلاوي، أرفع راسك انت في الأهلي، والأهلي فخور بيكم وانتوا كمان فخورين انكم في الاهلي".

وأردف :"من سنة ونص انا قولتلكم انتوا احسن مجموعة في القارة الافريقية لان أنا كنت عارف قدراتكم وعارف مجموعة زيكم ممكن تعمل ايه. متخلوش حد يسرق منكم فرحتكم. الجمهور اللي بيهتف النهاردة ليه حق علينا اننا نفرحه في اللي جاي".

أيضًا قال :"الجمهور هو الشريك وهو السند وصانع بطولات الأهلي من 1907، احنا من 1907 بنمشي بالحب دة والمجموعة دي، هو ده التاريخ اللي لازم تفخروا بيه. جمهورنا فخور بده، وعارف ان كل كام سنة ممكن حاجة تعدي".

وتابع :"فيه بطولات كتير جاية، ازاي نفرح الناس دي، البطولات الكتير اللي جاية لازم نفرح الناس دي، احنا غصب عننا مبيسبش حق. مش عاوز اعلق على الكلام ده دلوقتي. لكن احنا قصرنا معاكم. احنا كنا لازم نحتفل بيكم بلقب التاسعة والعاشرة والسوبر، بس مكنش فيه وقت".

وأتم :"لكن حقكوا علينا النهاردة نعملكم احتفالية نكرمكم فيها لانكم تستاهلوا ده. خلاص خلص اللي خلص. خلاص نفكر في اللي جاي. وانتوا تقدروا تكتبوا تاريخ جديد ليكم ولناديكم.. بشكركم ومقدرين مجهودكم وجمهوركم مقدر مجهودكم ونفكر في اللي الجاي من بكرة الصبح".