واصل وائل جمعة لاعب النادي الأهلي السابق والمحلل الفني بقنوات بي إن سبورتس توجيه الانتقادات للجنوب إفريقي بيتسو موسيماني المدير الفني للفريق الأحمر.
وخسر النادي الأهلي لقب دوري أبطال أفريقيا بعد الهزيمة أمام الوداد بهدفين دون رد في المباراة التي جمعت بينهما مساء اليوم الإثنين على ملعب مركب محمد الخامس بالدار البيضاء.
وقال جمعة خلال حديثه عبر قناة بي إن سبورتس بعد نهائي دوري أبطال أفريقيا: "التجهيز كان سيئ من الجهاز الفني وموسيماني قبل المباراة، وده كان باين في أول 20 دقيقة، اللعيبة مش مستعدة للي هتقابله في المباراة.. المفروض أنت كمدرب تجهز اللعيبة للسيناريو اللي هتلعب بيه في المباراة، لكن كنا بنشوف لعيبة الأهلي لما بتستلم الكورة مش عارفين هيتحركوا ازاي او هيلعبوا لمين".
وأضاف: "كنت بتلجأ للكرات الطويلة في الشوط الأول، والكلام ده استمر في الشوط الثاني وانت كمدرب لم تتدخل ومشوفتش طريقة تانية تلعب بيها وتضغط بيها على الوداد.. ودي نفس مشكلة الفريق في الدوري.. احنا معندناش مشكلة شخصية مع موسيماني احنا بنحب الأهلي وبس".
وأكمل: "لما الأهلي كان كويس مع موسيماني محدش جاب سيرته ولا انتقده، وأنا انتقدت موسيماني لما الفريق كان كسبان الرجاء، مش مستني الأهلي يخسر علشان ننتقدم موسيماني، والرسالة وصلتله وحاول يتواصل معايا".
وواصل: "ماشوفتش موسيماني مع الأهلي عمل تغيير في الفريق ولا طور من أداء لعيبة هو لما جه الأهلي استلم لعيبة كويسة ومستواها كويس، وقدر مع الأهلي يفوز ببطولتين أفريقيا في سنة واحدة وده تاريخ اتكتب لكن التطوير الفردي للاعبين وجمالية الأداء مكناش بنحسه والفوز كان بيداري ويغطي لما بتخسر بيحصل الانتقاد ويبان شغله اذا كان صح ولا غلط".
وأتم وائل جمعة حديثه: "الفريق مش بيبان عليه شغل فردي مع اللاعيبة في لاعيبة كتير مش مبسوطة بالشغل اللي بيتعمل مفيش تحضير جيد للاعيبة، الأهلي بيكسب بموسيماني أو غيره اللحظة الحاسمة اللي فيها بطولة زي انهاردة شغل المدرب بيبان في التعامل مع المباراة".