كشف أحمد شوبير الإعلامي بقنوات أون تايم سبورتس، عن كواليس جديدة في مفاوضات النادي الأهلي مع حسين الشحات لاعب الفريق الأول لكرة القدم بالنادي، لتجديد تعاقده.

وينتهي عقد حسين الشحات مع النادي الأهلي بنهاية الموسم الجاري، ويحق له التوقيع لأي فريق، لأنه أصبح لاعبًا حرًا حتى هذه اللحظة.

وقال شوبير خلال حديثه عبر إذاعة أون سبورت: "تم تحديد موعد كان كابتن حسام غالي هو اللي هيقعد مع حسين الشحات واللي راح أخو حسين الشحات بسبب التزامات كان مرتبط بيها حسين فحسام غالي قال لازم يكون حسين موجود مينفعش اتكلم من غير وجوده".

وأضاف: "حسين معندوش مشاكل يعتبر فري.. هل عنده عروض؟ كلها عروض شفهية مفيش عرض رسمي وصل النادي الأهلي، ممكن يكون العروض مش هتيجي على النادي الأهلي باعتبار ان اللاعب فري".

وأكمل شوبير: "الكلام اللي طالع من إدارة الأهلي أن في رتوش لازم يتفقوا عليها.. لكن حسين الشحات رافض نسبة المشاركة تكون في العقد الجديد".

وأوضح: "العقد بيبقى 100% منهم 25% من نسبة المشاركة يعني اللاعب بيشارك 50% من مباريات الموسم لو أقل من 50% مياخدش الـ 25% يبقى عقده 75%".

واختتم شوبير حديثه: "حسين الشحات قالهم قدروا أني لو ملعبتش لسة القصة بالنسباله مش باينة حتى هذه اللحظة الكلام اللي طالع أن الأمور ليست بعيدة مصدر مقرب من حسين قالي مش بنتشرط على النادي الأهلي في شوية نقاط بنظبطها".