كشف أحمد شوبير الإعلامي بقنوات أون تايم سبورتس، عن العروض التي يمتلكها حسين الشحات لاعب الفريق الأول لكرة القدم بالنادي الأهلي خلال الفترة الحالية.
وقال شوبير خلال حديثه عبر إذاعة أون سبورت: "حسين الشحات أثناء تواجده في معسكر المنتخب الوطني تلقى اتصال من أحد المسئولين في نادي أم صلال القطري، حسين يقدر يوقع دلوقتي لأي نادي لأن عقده خلص.. حسين ببلاش لأن عقده مع الأهلي خلص المبلغ هيكون له هو مش للنادي".
وأضاف: "العرض اللي جاله من أحد الأندية السعودية يوازي مليون و800 ألف دولار في الموسم.. العرض من النادي القطري تقريبا 2 مليون دولار في الموسم.. لو حسبت الدولار على 35 جنيه يبقى بتتكلم في 70 مليون جنيه".
وأكمل: "الأهلي كان عارض 13 مليون جنيه حسين طلب 15 مليون الأهلي وافق، حسين اتكلم في نسبة المشاركة قالوا في خلال انهاردة أو بكرة هيقعدوا معاه وتم رفع الأمر لمحمود الخطيب علشان ياخد قرار.. نفترض الأهلي وافق على إعفاءه على نسبة المشاركة هل حسين هيوقع للنادي الأهلي؟ كنت دايمًا بقول مفيش خلاف بين الأهلي وحسين لكن مكانش في العروض اللي بقولها".
وأردف: "حسين بيقول للمقربين منه أن ده آخر عقد أنا بوقعه لأن عنده 31 سنة لما تيجي تمضي معاه تاني هيبقى عنده 34 سنة الارقام بتتناقص وأسماء الأندية بتتناقص والطلب عليه نفس يبدأ يقل حتى من ناديه الأساسي".
واختتم أحمد شوبير حديثه: "أنا عندي شك في إمكانية أن حسين الشحات يستمر مع النادي الأهلي معنديش معلومة بس عندي شك داخلي.. الرقم المعروض عليه مش هيجيله مرة تانية من هنا شايف أن بعد ما كنت بقول الموضوع قريب بتصور أن بعد العروض اللي جاتله إذا تم ترجمتها على أرض الواقع هتبقى الدنيا صعبة".