أكد عدلي القيعي، رئيس شركة كرة القدم بالنادي الأهلي أن القلعة الحمراء لا تنتظر اللاعبين المغادرين من الزمالك لضمهم، مُشيرًا إلى أن المنتمين للزمالك ظلوا يفتخرون بضم حسين ياسر المحمدي ودومينيك دا سيلفا بعد رحيلهما عن الأهلي.
وقال القيعي في تصريحات عبر برنامج ملك وكتابة على شاشة قناة الأهلي: "البعض يقول إنه يطالب بالاستقرار مثل الأهلي، (هو مين اللي يديك الاستقرار؟ الاستقرار ده بتاعك انت، هو حد بيدي حاجة؟ بيقولوا اديني فلوس واديني شعبية.. طب لما كل الناس تديك كل ده، يبقى انت لزمتك ايه.. ماذا تفعل؟) ".
وأضاف:" (الزمالك والكباري؟ كباري ايه اللي اتعملت فيكوا؟ طب تعالى اعمل كباري لكل لاعيبتنا وخدهم.. اللي عايز يتعمل فيه كوبري في النادي الأهلي مش هنزعل عليه.. مش هنقضي عمرنا نقول اصل الزمالك عامل كوبري.. طب ما يعمل كوبري، ما هو اللاعب عاوز يسيبك) ".
وتابع:" (الزمالك بيفخروا بملف حسين ياسر المحمدي ودومينيك دا سيلفا.. دومينيك كان مصمم ياخد الاستغناء، وقولت للكابتن هادي خشبة خلي بالك ده متفق مع الزمالك، قالي طب ما يروح طالما عاوز كده) ".
وأكمل:" (إذا كنت هتشتغل كرد فعل لنجومية حد مش هتطور نفسك.. المفروض تفضل باستمرار بتسعى تاخد خطوة لقدام، وكل ما يجيلك نجم تبقى عاوز أحسن، والنجم يتطور معاك) ".
وأردف: "بيرسي تاو دولي في جنوب إفريقيا، وعلي معلول وكريستو دوليان في تونس، وقندوسي دولي في منتخب الجزائر، وأليو ديانج دولي في ماليا، ورضا سليم دولي في المغرب.. (ياللي بتقول مستنينك تختارلنا، لو كنا مستنينك مكانش بقى ده حالنا.. كباري ايه اللي بتتعمل يا اخوانا؟ عيب) ".
وأتم عدلي القيعي تصريحاته قائلًا: "الدولة تريد من الأندية أن تعمل وتجتهد وتنجح وتشرفها، الدولة لا تريد من الأندية أن تلقي عليها بمشاكلها وتنتظر منها حلها وأن تمنحها الاستثناءات".