أكد حسام عاشور قائد الفريق الأول لكرة القدم بالنادي الأهلي الأسبق، أنه كان يتمنى الاستمرار داخل القلعة الحمراء بسبب البرازيلي داني ألفيس لاعب برشلونة الإسباني السابق.

وقال عاشور خلال حديثه عبر قناة dmc: "كان نفسي اقعد سنة كمان لو قعدت سنة كمان حتى لو ملعبتش بشكل أساسي.. أنا كان عندي طموح كان عندي 36 بطولة وألفيس كان 41 لو كنت قعدت السنة دي وخدت الخمس بطولات مع النادي الأهلي كنت هبقى أكتر واحد واخد بطولات في العالم كله ودي حاجة تشرفني وبسعى ليها من زمان".

وأضاف: "قعدت مع كابتن الخطيب بس ساعتها قالي المدرب هو اللي بيقرر ودي عادة النادي الأهلي وقالي المشكلة مش فينا احنا كإدارة هو فايلر اللي مش موافق أنك تجدد".

وأكمل: "في ساعتها كنت زعلان ومتضايق وشايف أني مستحقش أني يحصل كدة فيا ممكن أكون قولت حاجة غلط وطلعت وقولت أني بتأسف للنادي الأهلي وكابتن الخطيب وجمهور النادي الأهلي".

واختتم حسام عاشور حديثه: "كل واحد بيغلط لو ابنك غلط مش هتدبحه هتتكلم معاه بالراحة ممكن تعنفه الموقف اللي النادي خده ليهم كل الاحترام والتقدير دي سياسة النادي ودي سياسة مجلس الإدارة".