أعرب ياسين مرعي، مدافع الفريق الأول لكرة القدم بالنادي الأهلي والمنضم حديثًا من صفوف فاركو، عن سعادته البالغة بالانضمام إلى القلعة الحمراء، مؤكدًا أن هذه الخطوة تمثل حلمًا طال انتظاره.

وقال مرعي، في تصريحات تليفزيونية: "شرف كبير ليا إن كل الجماهير دي تطالب بيا، وده كان حلم من أحلامي. كل ده نتيجة تعب وشقى سنين فاتت من عمري في الكورة".

وأضاف: "أنا أكبر إنجاز لوالدي في حياته، من بين كل صفقاته اللي فاتت واللي جاية، لأني انضممت للأهلي. هو كل آماله في الدنيا يشوفني أنا وإخواتي في أحسن مكان في العالم، وسط شغله وصفقاته".

وتابع: "النادي الأهلي مش محتاج كلام هو أكبر نادٍ في إفريقيا والوطن العربي والشرق الأوسط. كل مركز في الفريق فيه 3 لاعبين على الأقل، وكلهم لاعبين دوليين يقدروا يشيلوا الفريق. مفيش حاجة اسمها أساسي وبديل في الأهلي".

وعن كواليس انتقاله، أوضح مرعي: "المفاوضات بدأت بسرعة وقوة، لكن بعد كده هديت شوية بسبب مشاركة الفريق في كأس العالم للأندية. الحمد لله ربنا أكرمني، وانضممت في الوقت المناسب".

واختتم تصريحاته قائلًا: "دلوقتي فيه شغل كبير بيتعمل مع الفريق، وحلو جدًا إني بدأت مع الفرقة من أول الوديات، وده بيساعدني على الانسجام والتأقلم"