كشف الإعلامي أحمد شوبير، حارس مرمى الأهلي ومنتخب مصر السابق، عن تطورات جديدة بشأن ملف تجديد عقد الثنائي إمام عاشور وأليو ديانج، مؤكدًا أن النادي الأهلي بدأ خطوات فعلية في التفاوض مع اللاعبين للحفاظ على قوام الفريق.

وقال شوبير خلال تصريحاته الإذاعية صباح الأحد:"الأهلي فتح باب التفاوض مع إمام عاشور لتجديد عقده، رغم أن متبقي في عقده 3 سنوات، لكن النادي يريد التحرك من بدري، لأن مفيش حاجة مضمونة دلوقتي في عالم كرة القدم، فكرة اللاعب اللي بيجدد على بياض دي خلاص انتهت".

وأوضح أن النادي يرغب في تأمين استمرار العناصر الأساسية مبكرًا، ضمن خطة الاستقرار الفني للموسم المقبل.

وعن موقف المالي أليو ديانج، أوضح شوبير:"الأهلي بدأ حديثًا مع ديانج، لكن الملف ده مرتبط بكأس الأمم الأفريقية، النادي مستني البطولة دي علشان يحسم مصيره بشكل نهائي، وده بيوضح قد إيه الأهلي بيدير ملفاته بتأنٍ".

أضاف شوبير:"من الطبيعي إن في لاعيبة يكون عندهم طلبات، لاعب بياخد قرشين ممكن يطلب يبقوا أربعة، ده طبيعي، لكن في ناس تانية زي كريم فؤاد الأمور ماشية معاه بسهولة ومفيش مشاكل في الفلوس".

واختتم شوبير تصريحاته قائلًا:"ممكن الأهلي يكون خلص مع لاعيبة بالفعل ولم يعلن، وده وارد جدًا، لأنه ممكن يكون مستني توقيت معين للإعلان الرسمي، عشان الرسالة توصل للجمهور بالشكل المناسب".