كشف وائل جمعة نجم الأهلي السابق عن رأيه في الأحداث الأخيرة الخاصة بأزمة مباراة القمة الأخيرة، ونتيجة عدم لعب المباراة والأحداث المتتالية لقرارات رابطة الأندية واللجنة الأوليمبية.

وقال جمعة في تصريحات قبل مباراة الأهلي والهلال السوداني في دوري أبطال أفريقيا: "أزمة مكنش ليها لازمة بتبين حالة العبث الكروي في مصر وسوء الادارة اللي موجود في مصر".

وتابع: "كل الناس اللي شاركت في المهزلة اللي حصلت اساءت لمصر وللرياضة المصرية، ومصر كبيرة جدا وصورتها أكبر من اللي حصل في الاعلام الرياضي واللي بيحصل في مصر".

وأضاف: "في البداية كنت شايف ان الاعتذار وقرار الاهلي كان خطأ ومكنتش معاه لما تشوف الظروف قبل القرار وظروف المنافسين، انت اديت ليهم الروح والامل انهم ياخدوا بطولة الدوري منك اديتلهم فرق نقاط ممكن متقدرش تعوضوا بعض كده".

وأكد: "ظروفك انت افضل واحسن العب بكل المتاح قدامك انت كسبتهم قبل كده بحكام مصريين وحكام اجانب وممكن تكسبهم تاني ، ودي نقطة انا في البداية مكنتش حاببها بصراحة، انما لما شوفت رد الفعل عند المنافسين دول والاعلام الرياضي لا الاهلي كان عنده حق".

وزاد: "لما شوفت المنافسين دول اللي هما يعتبروا مباشرين ليك في الازمة دي واستفادوا من اللي انت عملته الاهلي كان عنده حق ، عنده حق في 3 حاجات كان في نغمة في مصر ان الاهلي نادي الدولة ده محصلش والا كان قرار الاهلي يتنفذ فالنادي الاهلي مش نادي الدولة باعتراف صريح كده".

وأكمل: "النقطة التانية انت ليه تعمل في النادي الاهلي كدة ليه عاوز توقعه ليه عاوز تدخله في مشكلة ليه الاهلي مشرف مصر وافريقيا وبيلعب في بطولات عالمية وصل مصر لمرحلة مفيش ناد تاني وصلها":

واختتم: "اجتهد انت واسع انك تبقي زي النادي الاهلي ، النقطة التالتة والمهمة واهم من النقطتين اللي فاتوا ،، ان الحكام المصرين ممتازين وعليهم سكر ومميزين جدا".