أعلن الإعلامي أحمد شوبير عن ملامح الجهاز الفني المؤقت للنادي الأهلي، واللي هيقود الفريق الأول لكرة القدم لحد نهاية الموسم الحالي، بعد رحيل المدير الفني السويسري مارسيل كولر عقب الخروج من دوري أبطال أفريقيا.

وقال شوبير في برنامجه الإذاعي "مع شوبير" على إذاعة "أون سبورت إف إم": "فيه اجتماع النهاردة مع لاعبي النادي الأهلي، واللي هيقود الاجتماع هو الجهاز الفني الجديد، وبنسبة كبيرة - ومجرد اجتهادات - الكابتن محمد يوسف هو اللي هيكون المدير الفني لحد نهاية الموسم".

وأضاف: "الكابتن محمد يوسف خلص مهمته مع حرس الحدود وضمن البقاء في الدوري، وعشان كده بنسبة كبيرة هيكون هو المدير الفني المؤقت، وهيعاونه الكابتن محمد شوقي، اللي في نفس الوقت هيقوم بأعمال مدير الكرة".

واستكمل شوبير: "هيتم تصعيد مدرب من قطاع الناشئين علشان يساعد محمد يوسف في الجهاز الفني، لحد ما النادي يتعاقد مع مدير فني أجنبي جديد".