تحدث المدير الفني للفريق الأول لكرة القدم بنادي الزمالك أيمن الرمادي عن مواجهة القلعة البيضاء ضد بيراميدز وعن فكرة تفويت المباراة.
وقال الرمادي:" مبقبلش الكلام اللي بيثار، الزمالك فريق كبير وتقاليده تقاليد نادي عريق ميفعش أقول إن الزمالك هيلعب المباراة دي ملناش علاقة، لينا علاقة إن الزمالك يكون قوي أعتقد اللي بيقول الكلام ده ميعرفش تقاليد الأندية الكبيرة".
وتابع:" أحيانًا يقولك المدرب الفلاني أو النادي الفلاني متهاون في مباراة معينة، جبتوا الكلام ده منين؟ إزاي الكلام ده يتقال؟ إزاي أنا كنادي أقبل وأنا نادي طول عمري تاريخي كبير وحافل يفتخر بيه الأبناء، إزاي أحط نفسي في موقف أكون متهاون في مباراة وفين أدبيات الرياضة".
وأضاف:" اعتقد الكلام ده ما أحبش إنه يتداول لأن الكلام ده لو حقيقة تأكد محدش يقبل بيه صدقني لم يتحدث فيه أحد، لو اثير محدش هيقبله، أي شخصية بتحترم ناديها وجمهورها لا تقبل إن نكون أداة مساعدة لأي حد، إحنا عندنا فقط نادينا ، احنا نادي قوي وقوي جدًا، لما نحتاج هنعملها بأنفسنا، لا هنلعب بـ 300% عشان خاطر نادي آخر ولا هنلعب 50 % عشان نادي آخر".
وأكمل:" هنلعب أي مباراة جاية لأن في النهاية احنا نادي الزمالك، إحنا عندنا أسس راسخة بنعملها لأبنائنا، تخيل أقول للاعب شد حيلك في المباراة دي بالذات عشان خاطر فلان الفلاني والمصيبة الأكبر هل ينفع أقول للاعب مش أوي خليك شوية شوية؟ هل ده يقبل؟".
وأردف:" هل أنا انهاردة أجي أكلم لاعيبتي وأفقد إحترامهم ليا وأقولهم مثلاً خلينا شوية شوية؟ إزاي؟ فكلام غير مقبول أبدًا أبدًا".