تحدث الإعلامي أحمد شوبير عن آخر التطورات المتعلقة بالسعة الجماهيرية للمباريات خلال الموسم الجديد، مؤكدًا أن معظم الملاعب باتت متاحة بكامل طاقتها، باستثناء ملعبي برج العرب واستاد القاهرة.

وقال شوبير عبر برنامجه بقناة "الأهلي":"النهاردة السعة الجماهيرية بقت كاملة في كل الاستادات، باستثناء برج العرب واستاد القاهرة، وده شيء إيجابي وإحنا ماشيين في اتجاه جميل".

وأضاف:"فيه خطأ بيتقال إن كل فريق هياخد 30 ألف مشجع في استاد القاهرة، وده مش صحيح. الصح هو إن السعة القصوى 30 ألف، مقسومة 15 ألف للأهلي و15 ألف للزمالك".

وتابع: "كنت لسه في مكالمة مع النائب أحمد دياب، وقلت له: لو الأهلي أو الزمالك بيلعبوا قدام فريق زي سيراميكا أو البنك الأهلي، وتذاكر الأهلي مثلاً خلصت الساعة 10 بالليل، والفريق المنافس تذاكره لسه، هل ممكن نفتح باقي السعة لجمهور الأهلي؟".

واختتم شوبير:"طبعًا ده بيكون بموافقة أمنية، لكن وجود اقتراحات مرنة بالشكل ده مهم، ونتمنى أن الأمور تمشي بشكل منظم ومحترم وتحقق أقصى استفادة ممكنة للجماهير".