انتقد إبراهيم حسن، مدير المنتخب المصري، الهجوم الذي يتعرض له المنتخب الوطني من بعض المنتقدين، مؤكدًا أن منتخب مصر يجب أن يكون بعيدًا عن الصراعات والانتماءات، وذلك خلال تصريحاته عبر قناةMBC مصر عقب مباراة الأرجنتين في كأس العالم.

وقال إبراهيم حسن: "ولازم بقى الناس الشريرة، والناس الوحشة، والناس اللي بتحارب منتخب بلدها، كفاية بقى. إحنا منتخب، ولازم ما نتحاربش من بره ولا من جوه."

وأضاف: "هو إنت عشان تعمل ترند؟ ولا مرتبك بتاخده من الاعتراض؟ ولا ضد منتخب بلدك تعمل أي حاجة وتبيع نفسك عشان إيه؟ عشان ترند؟ يا أخي اشتغل، روح قول كلمتين كويسين، ولو قاعد قدام في استوديو قولهم بأدب وباحترام، مش لازم تجرح في الناس عشان يزودولك المرتب الشهري، ولا عشان كان نفسك تدرب وفشلت. اشتغل يا أخي بضمير، على الأقل يبقى منتخب بلدك خط أحمر."

وواصل مدير المنتخب المصري تصريحاته قائلًا: "شجع ناديك مع ناديك باحترام، إنما توصل لمنتخب بلدك احترم نفسك. إنت شعار بلدك مصر. تعالى شوف منتخبك بيتحارب إزاي، ما زعلتش إن منتخب بلدك يتظلم ويتقهر في الملعب؟ بدل ما تقول: لا، ده أنا في ضهر المنتخب، لعبت في ضهر المنتخب وفي ضهر جهاز المنتخب."

واختتم إبراهيم حسن حديثه بالإشادة بدعم الجماهير المصرية، مستشهدًا بما وصفه بمواقف الفلسطينيين، قائلًا: "تشوف الناس المصريين بتصرف فلوس عشان تيجي وتحضر الماتشات، وإنت قاعد في التكييف عمال تهاجم. اتقوا الله في البلد دي، البلد دي تستاهل إنك تدعي لها. يا أخي، في غزة قاعدين في خيام، قاعدين في التراب، وبيرفعوا علم مصر وبيشجعوا من قلبهم، وإنت ضد منتخب بلدك؟"