وجه عماد متعب نجم الأهلي رسالة مؤثرة لصالح جمعة متوسط ميدان الأهلي بأنه يعلم موهبة صالح وإمكانياته ويجب عليه الحفاظ على مستقبله والفرصة التي لا تأتي لأي لاعب خاصة أنه يلعب في صفوف الأهلي.

وأوضح متعب في تصريحات عبر قناة اون تايم سبورتس: "فرصة ما بتجيش لحد، افهم انت في الأهلي، هتعرف تعمل كل حاجة بعد الكرة الا أنك ترجع تلعب كرة تاني، أنا قاعد اهو نفسي ارجع العب 5 دقايق في الملعب، مش عارف مبقاش ينفع ركز في حياتك وركز في الكرة وبعد ما تبطل امشي على السقف اعمل اللي انت عاوزه ركز في الكرة".

وأضاف متعب: "لو ليه حكم على صالح هحبسه في البيت، مش هخرجه غير على التمرين ست شهور، سنة، اعينله ناس قاعدة معاه ما يروحش غير التمرين، لاعب موهوب".

وتابع متعب: "ربنا مديله صالح حب الناس، في يوم من الأيام لما كنت في الأهلي، قولتله عاوز اعرف الناس بتحبك ازاي، احنا طلع عينينا وقعدنا سنين وخدنا بطولات، اتفرمنا عشان الناس تبدأ تحبنا، انت الناس بتحبك وانت معملتش حاجة دي حاجة كبيرة حافظ عليها".

وأشار نجم الأهلي موجها حديثه لصالح جمعة: "الكرة مش انك تلعب شهرين تلاتة لحد ما أوصل اني ابقى أساسي وارجع اكبر دماغي، بعد ما تطبل اعمل اللي انت عاوزه، انت لاعب كرة فاكر لو متمرنتش هتبقى موجود، الناس مش هتحبك أكتر من الأهلي، الناس بتحبك دلوقتي بس انت بتخسر الناس يوم بعد يوم".

واختتم متعب تصريحاته: "يا صالح حافظ على النعمة اللي ربنا اديهالك، على ما أعتقد 60-70 مليون نفسهم ياخدوا فرصة في الأهلي، انت جوه الأهلي وانت اللي بتبعد، يارب يرجع، هي في ايده هو، النادي عمل معاه كل حاجة، والمدير الفني عمل كل حاجة، عندك مثال أخوه عبد الله في الزمالك، عندك فرصة الناس بتحبك بس انت اللي بتخسر الناس".