فجّر محمد الغزاوي، عضو مجلس إدارة النادي الأهلي، عدة مفاجآت من العيار الثقيل خلال لقائه مع الإعلامي أحمد شوبير، كان أبرزها الحديث عن كواليس صفقة أحمد سيد "زيزو.

وقال الغزاوي: "زيزو لاعب من طراز نادر، مش موجود منه كتير، التزامه وأخلاقه قبل موهبته، وده اللي بيخليه يندمج بسرعة مع الفريق ويساعده على تحقيق البطولات، وجوده مكسب كبير للنادي الأهلي وللفريق".

وعن مفاجأة انتقاله، أضاف: "ناس كتير كانت شايفة إن انتقال زيزو للأهلي مستحيل، لكن مفيش حاجة اسمها مستحيل في وجود طموح وإرادة، أي لاعب بيحلم بالأهلي، لكن المهم إن يكون فعلاً حابب الأهلي من جواه، وده اللي حصل مع زيزو".

وكشف الغزاوي كواليس مثيرة لأول مرة: "حسني عبد ربه وقّع للأهلي، وهاني سعيد، ومحمد صلاح أبو جريشة، وأحمد دويدار، وحتى شيكابالا.. كلهم وقعوا للأهلي في وقت ما، لكن ظروف مختلفة منعت اكتمال التعاقدات، النادي الأهلي في كل مرة قال شكراً واتمنالهم التوفيق، لأن مبادئ النادي ما بتتغيرش".

وتابع: "زيزو كان معايا في المغرب وقت استلامي جائزة أفضل نادٍ في إفريقيا ممثلًا عن الأهلي، كان محترف جدًا في رد فعله، رغم إن الجائزة كانت المفروض أحسن لاعب داخل القارة تروّح له، لكن حسيت من كلامه إنه مركز في اللي جاي، مش في اللي فات".

وعن المدير الفني ريبيرو، قال الغزاوي: "أنا شايفه انسجم بشكل سريع رغم التوقيت الصعب. عجبني جدًا تصريحه في المؤتمر الصحفي لما قال مفيش حاجة اسمها لسه جايين، إحنا مسؤولين من أول يوم،التمرين كان قوي، والماتش اللي فات كان فيه فكر واضح، وإن شاء الله نبدأ رحلة بطولات معاه من البطولة اللي جاية".