قال محمد الدماطي عضو مجلس إدارة النادي الأهلي، عبر حسابه على موقع فيسبوك: "بقالي حوالي شهر و نص قافل الفيسبوك و كل السوشال ميديا تماما ، و امبارح بس فتحت و نزلت صورتي مع الكابتن الخطيب كنوع من الدعم الأدبي لراجل عمل كتير للنادي و بيفضل النادي علي نفسة ، و لة فضل عليا بعد ربنا اني اكون موجود و امثل كيان الاهلي العظيم".
وأضاف: "فرصة بما ان في حالة هدوء حتي لو مؤقت اقول كلمتين لعل و عسي يحصل نوع من التوضيح ، و كالعادة أنا بتكلم من قلبي و بما يرضي الله و مش بزعل من اي نقد او تجريح لاني عارف ان دي ضريبة المكان اللي أنا في ، و لاني متاكد ان النادي الاهلي هو مصدر السعادة يمكن الوحيدة ل٨٠ مليون بني ادم فطبيعي يحصل زعل ، زي لما في اي نجاح بيحصل اشادة". وتابع: "مفيش حد أبدا سعيد بالنتائج و دة كان واضح جدا في بيان النادي ان في عملية إصلاحات كبيرة حتتنفذ الفترة الجاية ، و طبيعي في اي منظومة في العالم يحصل اخطاء نتيجة الضغط ، الشطارة ان الاخطاء تبقي قليلة و يتم تداركها سريعا ، و اعتقد ان حجم البطولات و الإنجازات في ال٨ سنوات اكبر بكتير من حجم الإخفاقات".
وأوضح: "الضغط المستمر اللي بيولد اخطاء مش بس علي الادارة ، ممكن كمان يكون علي المدربين و اللاعبين ، ممكن الاختيار فنيا يكون سليم لكن قدرة المدرب او اللاعب علي استيعاب حجم المتطلبات و الضغوطات يبقي ضعيف ، و دة بيحصل و طبيعي".
وأشار الدماطي: "النادي الاهلي بيستمد قوتة من جمهورة ، محتاجين الجمهور يبقي كلة علي قلب راجل واحد ، مش عايزين خناقات و تنمر علي لاعيبة ، اللي بيلعب راجل احنا كلنا في ضهرة ، و عايزين نبص علي الكورة ككورة و كلنا نبقي وحدة واحدة".
واختتم: "حنرجع ؟ اكيد حنرجع ان شاء الله، النادي الاهلي منظومة مش بتعرف الفشل ، اسم الاهلي زي الجبل ما يهزة ريح طول ما الكل حاطط اسم الاهلي قدامة، اعظم نادي في الكون".