قال المهندس خالد مرتجي، عضو مجلس إدارة النادي الأهلي، في تصريحات عبر قناة "أون تايم سبورت"، إن التحضيرات لكأس العالم للأندية بدأت منذ عام كامل، وإن النادي شارك في ورش عمل متعددة مع الفيفا استعدادًا لتنظيم هذا الحدث العالمي.

وأضاف مرتجي:"الناس دايمًا بتاخد الحاجة الأخيرة، مبتبصش إيه قبل كده. احنا لو اتكلمنا على النادي الأهلي، احنا بقالنا سنة في وركشوبس – ورش عمل – مع الفيفا عشان تنظيم هذا الحدث العالمي."

وتابع قائلًا:"زي ما بنشكر شركائنا، أشكر التيم اللي شغال معايا بقالنا سنة. المجهود اللي اتعمل، الحمد لله، احنا حضرنا التيم أريفيل ميتينج، الراجل اللي قعد معانا، عمل معانا قبل كده، بيقولي: أنتم مش محتاجين إن احنا نتكلم على حاجة، أنتم أصلًا عندكم خبرة أكتر مننا في كأس العالم للأندية."

وأكد مرتجي أن الأهلي اليوم نادٍ عالمي، ويجب استغلال اسمه وكيانه بطريقة اقتصادية ذكية، وقال:"الناس لازم تفهم، النهاردة النادي الأهلي نادي عالمي، ولابد إنه يستغل اسمه وكل حاجة عشان يقدر يعمل من وراها فلوس."

وأضاف:"النهاردة الأهلي عمل شركات ليه؟ مش عشان نقدر نصرف من الموارد؟ واحنا محتاجين فلوس كتير. واحنا لما بنعمل حاجة، طالما بانضباط، وفيها نوع من العائد المادي، وفي نفس الوقت مبيأثرش مع أي حاجة تاني، كل الفرق العالمية بتعمل كده يا كابتن."

واختتم حديثه قائلًا:"أنت النهاردة بتعمل شركات عشان تضاهي المصاريف اللي أنت بتصرفها. الميزانية بتاعتنا معدية السبعة ونصف مليار."