كشف الدكتور محمد أسامة، طبيب الزمالك السابق، أن عددًا من الصفقات الجديدة التي انضمت إلى الفريق لم تخضع لكشف طبي شامل قبل التوقيع، مؤكدًا أن بعض الإجراءات الطبية تم تجاهلها خلال الفترة الماضية.
وقال أسامة، في تصريحات عبر قناة "أون تايم سبورتس": "مش كل الصفقات اللي جات الزمالك اتعملها كشف طبي، وأنا كنت دايمًا بطالب بده، لكن مفيش سلطة مباشرة، أنا دكتور مش صاحب قرار. اللي فاكر إني عملت عليه كشف طبي فعليًا هو صلاح مصدق، لكن محمود جهاد ، بنتايك، والجفالي لم يُجرَ لهم كشف طبي قبل التعاقد".
وأضاف: "أنا اشتغلت معاهم بعد ما انضموا للفريق، علشان نحدد المشاكل ونحلها بأسرع وقت وما نخسرش وقت في الموسم".
وتابع طبيب الزمالك السابق: "مش هتكلم في تفاصيل طبية احترامًا للي جوه النادي، لكن شايف إن في حاجات محتاجة شغل. الجفالي وجهاد ماعندهمش مشاكل تمنعهم من اللعب، دول لاعيبة شاركوا في أنديتهم، بس ممكن يكون تغيير الحمل البدني هو اللي عمل شوية مشاكل، ودي محتاجة برامج تأهيلية بدأنا فيها بالفعل".
واختتم أسامة تصريحاته مؤكدًا: "أنا اللي شايل الضغط، ومش هتكلم أكتر علشان أحمي اللاعيبة. مفيش مشاكل كبيرة، لكن كان لازم يكون في نظام واضح من الأول علشان الأمور تمشي بشكل طبي سليم".