كشف الإعلامي أحمد شوبير تفاصيل حديثه الهاتفي مع إمام عاشور لاعب الأهلي، بشأن ما تردد حول مفاوضات تجديد عقده ومطالبته براتب كبير، مشددًا على أن اللاعب نفى كل ما تم تداوله في هذا الشأن.

وقال شوبير خلال برنامجه الإذاعي: "أنا كلمت إمام عاشور وسألته عن الكلام اللي بيتقال بخصوص طلبه الاجتماع و100 مليون جنيه و85 مليون، قالي ولا أي حاجة من دي حصلت، وأنا أصلاً ما طلبتش اجتماع ولا طلبت تجديد، الناس في النادي محترمين، وقالولي (يا إمام عايزين نجدد)، وأنا لسه فاضلي 3 سنين في الأهلي".

وأضاف: "سألته إذا كان زعلان، قالي (أزعل من إيه؟ الجمهور بيعاملني أحلى معاملة، وإدارة النادي محترمة جدًا، وأنا فئة أولى، والناس لما جابوني وعدوني ووفوا بكل حاجة وعدوا بيها)، وأكدلي إن دخول تريزيجيه وزيزو رفع من قيمة الفئة الأولى، وقال (الناس قالولي يالا بينا نقعد واتكلمنا ولسه متفقناش، لكن كل حاجة تمام والأخبار كويسة ومفيش زعل ولا غضب)".

وعن علاقته بكابتن محمد يوسف، قال شوبير إن إمام نفى وجود أي خلافات، وقال نصًا: "ولا أي حاجة، الكلام بيروح وييجي، وأنا مرتاح ومبسوط جدًا في النادي".

وتابع شوبير: "سألته عن رؤيته للموسم، قال (نفسنا نرجع إفريقيا تاني وزعلانين إننا مخدناش البطولة)، وعن علاقته بزمايله قال (فل.. كلهم حبايبي وأخواتي)، وأكدلي إن الأرقام اللي اتقالت ما اتقالتش ولا حد اتكلم فيها".

واختتم شوبير الحديث بكشف مستجدات إصابة إمام عاشور، قائلًا: "قالي الدكتور قاله من 10 أيام لأسبوعين يرجع بدون احتكاك، يعني تقريبًا قدامه شهر ويرجع 100%. إمام قالي إن العملية دي كانت ممتازة جدًا، وإنه كان بيلعب قبل كده وهو مصاب بالكتف، والوجع كان بيزيد مع الوقوع، لكن المرة دي الوضع مختلف، وكان بيحرك إيده تاني يوم بعد العملية، والدكاترة مطمنينه تمامًا".